Uhatut mettät

Joka minutti hävvii sađetmettää jalkapallokentän kokoisinna aloina sillä ko met saama ostaat halppoi mööpeliitä ja palmuöljyy ja syöđä halppaa häränlihhaa. Tätä käskethään mettän hävittämiseksi.

Mettän hävittäminen

Mettän hävittäminen muuttaa maapalloo. Rajut säätilat tulleevat tavalisemiksi. Lisäksi tuhanet elläin- ja kasvilajit kuoleevat.

Puunhakko ja karjanpito oon tärkkeimät syyt tähän.

Tuhanssii puita kaađethaan siksi ko met tehemä arvokkhaita puusorttii joista laitama mööpeliitä, venheitä ja fiinii terassilaattiita.

75 prosenttii mailman sađetmettistä oon hävitetty tahi tuhottu puunhakon tähđen.

Puita hakathaan alas kans sen tähđen ko tehđään laitumii lehmile. Se tullee isompi tulvavaara, ko ei ole puita jokka saattaavat immeet sađetvettä. Juuri alashakatut alat täyttyyvät veđelä ja vesi virttaa likheissiin jokhiin. Jovet tulviivat ushein jovenranttoin yli.

Ko sađetmettässä oon vähemät puita, muuttaa se sađetmettän ja koko maapallon kliimaa.

Sađetmettän puut puhđistaavat ilmaa ja tekkeevät oksygeenii. Ilman oksygeenitta met emmä saata hengittäät.

Forrige avsnitt

1 / 4

Neste avsnitt

Tiesitkö ette …

… nuoin 17 prosenttii Amazonasin sađetmettästä oon häviny viimisten 50 vuođen aikana? Enniimät osat jokka oon raivattu, käytethään karjanpithoon.

Amazonasin sađetmettä produseeraa 20 prosenttii mailman oksygeenista?

… mailmassa oli varhemin 15 miljoonaa kvadraattikilomeetterii trooppista sađetmettää.  Sen tähđen ko mettää oon hävitetty, oon sitä nyt jäljelä tyhä 6 miljoonaa kvadraattikilomeetterii.

Forrige avsnitt

1 / 3

Neste avsnitt

Kalttiit:

  • Junior vitenskap (2018)
    Orage Forlag AS
  • Hjermann, Dag Øystein; Larsen, Henning: regnskog i Store norske leksikon på snl.no.
    Hentet 21. august 2020 fra https://snl.no/regnskog
  • Hjermann, Dag Øystein: temperert regnskog i Store norske leksikon på snl.no.
    Hentet 21. august 2020 fra https://snl.no/temperert_regnskog