Ajatuseksperimentti:

Kuvittele mailman ilman öljyä!

Vuona 1859 Edwin Drake oli ensimäinen joka poras öljyä maasta. Siitä lähtiin mailma oon ollu täysin henkkaavainen tästä mustasta tihmeästä ainheesta jota löytyy sekä maapörästä ja merenpohjasta.

Yli biljuunaa (1000 000 000 000) tynnyriä öljyä oon nostettu maasta, mutta mitä jos mailmassa ei olis ennää öljyä jäljelä?

Oljeplattform i sjøen
Oljeplattform i sjøen

Polttoainet

1800-luvun lopussa tulthiin ensimäiset biilit joissa oon bensiinimotori. Siitä lähtiin olema käyttänheet upottoman monta liitteriä bensiiniä, dieseliä ja öljyä niin ette saisima biiliä, flyyiä ja traileria toimheen. 1900-luvun alussa sähköbiilit olthiin toelinen alternatiivi, mutta 1990-luvun keskivälistä lähtiin sähköbiilistä oon tullu aleti tavalisemat.

  • Miksi monet ostavat vieläki bensiini- ja dieselikäyttösiä biiliä?
  • Mitä tapahtuis flyyitrafikille jos öljystä laitettu polttoainet loppuis?
En fyller bensin på bilen sin
En fyller bensin på bilen sin

Kuljetus

Ajattele kunka paljon ruokaa, vaattheita ja elektrisiä apparaattia frahtathaan ympäri mailmaa. Tämä oon valtava verkosto lastibiiliä, laivoja ja flyyiä jokka frahtaavat tavaroita maanrajoitten ylitte ja kaupungista toisheen.

Polttoainet josta net oon henkkaavaiset, oon enimästi laitettu öljystä.

  • Miksi kuljetusala ei ala käyttämhään elektrisiä biiliä ja flyyiä?
  • Mitä kauppa-alale tapahtuis jos kuljetusala heittäis olemasta kokonhansa?
en lastebil parkeringsplass
en lastebil parkeringsplass

Ökonomia

Hirmu monet ihmiset työtelevät öljyalala, ja usheissa maissa öljy oon yksi tärkeimistä tienastista. Met norjalaiset emmä oltais pärjänheet niin hyvin ilman öljyalatta. Öljy oon antanu meile valtavia varoja ja tehny Norjasta yhen mailman rikkhaimista maista.

  • Mitä tapahtuis Norjan ökonomialle jos kukhaan ei ennää saattais työtelä öljyalala?
  • Miksi öljy saapi aikhaan konfliktia maitten välilä?
Flere stabler med mynter.
Flere stabler med mynter.

Työttömyys

Työttömyys olis valtavaa kaikkialla mailmassa jos öljy loppuis.

Ajattele kunka monet työtelevät öljyalala. Työtelevätpä het sitte öljyrustingilla, bensiinin ja dieselin produksuunissa öljyraffinerissa, öljyrustingitten rakentamisessa, polttoainheitten kuljetuksessa tahi bensa-asemilla.

Yli 200 00 ihmistä työtelee ammatissa joka liittyy öljyalhaan Norjassa. Kunka löytäisimmä työtä heile jos öljy loppuis?

En mann sitter utenfor jobben han akkurat har mistet
En mann sitter utenfor jobben han akkurat har mistet

Ruankaltiot

Sekä ruan produseeraajat ja myyjät oon täysin henkkaavaiset kulkuneuvoista jokka tarvittevat bensiiniä tahi dieseliä. Ei se ole monta traktoria tahi lastibiiliä jokka kulkevat sähkölä.

Miksi luulet ette ei? Kunka ihmiset reageerattais jos kaupat alethiin tyhventymhään ruokatavaroista?

  • Mikkä ruokatavarat loputtais ensimäisenä kaupoitten hyllyistä?
  • Kunka henkkaavaiset olema ulkomaalaisista tavaroista?
  • Mitä ilman sie häytyisit pärjätä jos taravankuljetus ulkomailta heittäis toimimasta?
Tomme butikkhyller med kun noen pakker med kjøtt igjen
Tomme butikkhyller med kun noen pakker med kjøtt igjen

Voimankaltiot

Yhtä suuri kriisi olis jos met emmä löytäis ennää hiiltä, siksi ko 40 prosenttia mailman sähköstä tullee hiilivoimaloista. Tookit jokka varhemin frahtathiin hiiltä ei ennää kulje.

Ilman hiilettä syntyis sähkönkatko, ja sähkön pantais kortile. Sillon sähkön hinnat noustais katthoon.

Suuret sikhuusit käyttävät varageneraattoria jokka toimivat dieselillä, elikkä nämätki oon henkkaavaiset öljystä.

  • Miltä sinun arki näyttäis jos sinula olis sähköä vain muutama tiima päivässä?
  • Mitä sie prioriteeraisit?
En stor by uten lys
En stor by uten lys

Sähköbiilit

Mailma minkä oon rakenettu biiliä varten, oon tullu henkkaavaiseksi siitä ette bensiinille ja dieselille löyethään alternatiivia. Ei vain kliiman, mutta kans sen tähen ette jonaki päivänä öljy loppuu.

Kaikista Norjan 3 miljuunasta biilistä oon 600 000 elektriset.

  • Mitä luulet ette tarvithaan niin ette yhä useampi valittis ostaat elektrisen biilin?
  • Kunka kauvas tulevaisuutheen sinun mielestä met hääymä kattoat ennen ko bensiini- ja dieselikäyttösiä biiliä ei ennää ole?
El-biler lader
El-biler lader

Polttoainetta eli ruokaa?

Monet biilimotorit käyttävät ruokaöljyä, sekä uutta ja käytettyä. Joissaki paikoissa mailmassa piethään muita raaka-ainheita, esimerkiksi rapsia, jyvvää ja maissia ko laitethaan polttoainetta.

Tätä polttoainetta kuttuthaan HKÖ:ksi (hydratoitu kasviöljy), ja tämä oon muutamanlainen uusintuva dieseli.

Useat selskaapit Euroopassa kokoavat ruokaöljyä restaurantista, suurköökistä ja kouluista.

  • Minkälaista hyötyä arvelet ette HKÖ:stä oon?
  • Oonko oikhein pittäät ruokaa polttoainheena?
En dame heller olje i stekepannen
En dame heller olje i stekepannen

Plastikki

Mutta polttoainet ei ole ainua asia jota met kaippaisimma jos meilä ei olis öljyä. Usheita tavaroita joita met tarvittemma oon näjet laitettu öljystä. Pari esimerkkiä tästä oon kymmihanskat, metesiinit, vaseliini ja plastikkifrakit. 

  • Sikhuusista vailuis paljon plastikkiproduktia jokka oon piossa tääpänä. Mitä seuraamuksia siitä olis?
  • Ajattele mitä kaikkea sie piät, jonka oon laitettu plastikista. Millä saattaisit korvata net?
To leger finner legemidler
To leger finner legemidler

Loppuvatko soat?

Viimiset suuret mailmansoat näytethiin ette taistelu resursista oon tärkeä. Osasyynä sothiin oli se ette osapuolet haluthiin turvata ittelensä resursia niin ko öljyä, rautaa ja muita tärkeitä raaka-ainheita. Se oli mahotonta käyä sottaa ilman öljyttä ja rauatta.

Se oon vieläki usheita maita jokka oon täysin henkkaavaiset öljyn ja gassin myymisestä ja ostamisesta. Vissit maat oon valmhiit käymhään sottaa niin ette net saatettais turvata nämät resursit ittelensä.

Tämä oon kans osasyynä Ryssän ja Ukrainan konflikthiin vuona 2022.

  • Oonko yhä maholista käyä sottaa ilman öljyttä?
  • Miksi öljy oon niin tärkeää sotimisessa?
Kamuflasjefarget bakgrunn.
Kamuflasjefarget bakgrunn.

Mistä met elämä öljyn jälkhiin?

Ko Norja löysi öljyä Pohjaismereltä 1960-luvula, se muutti kaiken. Meistä tuli yksi mailman rikkhaimista maista, ja met olema selvinheet ökonoomisista kriisistä.

Mistä Norja ellää öljyn jälkhiin?

Sitä monet tutkivat, ja het oon ehottanheet usheita jännittäviä ratkasuja. Jokku ehotuksista oon myyä tuulisähköä ulkomaile ja produseerata elektristen biilitten batteria.

  • Mihin muihin elämänkeinhoin sinun mielestä Norja pittää satsata niin ette saatais luotua työpaikkoja ja tienastia tulevaisuuessa?

Kaltiot:

  • Gundersen, Nils; Lundberg, Nils H.; Norsk Oljemuseum: petroleum i Store norske leksikon på snl.no.
    Hentet 11. januar 2022 fra https://snl.no/petroleum

Kuvat ja videot:

    1. Getty Images
    2. Getty Images
    3. Getty Images
    4. Getty Images
    5. Getty Images
    6. Getty Images
    7. Getty Images
    8. Getty Images
    9. Getty Images
    10. Getty Images
    11. Getty Images
    12. Getty Images
Close Icon

Loading...