Etikki ja moraali
Kaikila ihmisillä oon oikeus päättäät omasta elämästä. Met häymä kunnioittaat niitä päätöksiä jokka muut tekevät, ja muut häytyvät kunnioittaat meänki valintoja.
Ko sie vanhenet, sie saat päättäät enämen ittestästi ja omasta tulevaisuuesta. Sie päätät missä sie haluat asuat, missä sie haluat käyä koulua ja minkä kans sie haluat työtelä. Se saattaa olla vaikea valita, mutta sitä ei löy’y fasiittia sinun valinoile.
Ko sie siiryt elämhään ominpäin, saat tehä niin ko haluat joka ikinen päivä. Vaphaus oon jännittävä, mutta muista ette kaikila valinoila oon konsekvensit.
Joillaki valinoila oon konsekvensit vain sinule, toisila oon konsekvensit muile.
1 / 2
Mange veivalg
Oikea ja väärä
Se oon tärkeätä valita oikhein ette saapi ittele hyvän elämän. Met saatama valita olla hyvä vai huono ystävä, tahi hyvä vai huono kolleega.
Met saatama valita olla reheliset tahi met saatama valehella ja varastaat ette sauttaisima jotaki ilman työtelemättä sen etheen.
Jos sie saatat vähäsen etikin ja moraalin ympärit niin se oon helpompi tehä hyvät valinat.
Moraali
Moraali oon reekelit jokka jälläävät yhtheiskunnassa. Esimerkiksi opima jo nuorena ette met emmä saa varastaat ja valehella.
Meän yhtheiskunnassa oon monia tämmösiä reekeliä, ja muutaman niistä olet saattanu niin kauvon ettet ajattelekhaan ette net oon reekelit. “Niin” se vain oon.
Etikki
Met saatama sanoat ette etikki oon sitä mitä met ajattelema moraalista, elikkä se oon opetukset moraalista.
Ko met puhuma etikistä, met puhuma miksi joku oon oikhein tahi väärin. Miksi luulet ette met emmä saa valehella tahi varastaat?
1 / 3
Mann holder skilt for rett og galt
Etikin eri tyypit
Se löytyy erilaisia etikin tyypiä:
Kuvvaileva elikkä deskriptiivinen etikki kuvvailee yhtheiskunnan moraalisia reekeliä. Niin ko sie varmastikki ymmärät, saattaa kuvvaileva etikki olla joukon erilaista eri puolila mailmaa.
Normatiivinen etikki muistelee mikkä attityydit oon net oikeat. Luuletko ettet normatiivinen etikki oon samanlaista kaikkialla mailmassa?
Käytänöllinen etikki oon etikkiä praksisissa. Oonko oikhein tappaat soassa tahi tehä abortin?
Metaetikissä kyset oon siitä mitä moraali oikeastansa oon. Oonko olemassa fasiitti sille mikä oon oikhein ja väärin?
1 / 2
Jugekort bak ryggen
Normit ja arvot
Termilä normi meinaama sitä mitä yhtheiskunta pittää oikeanna. Semmoset normit oon kans erilaiset sen jälkhiin missä päin mailmaa met asuma, ja siksi se saattaa helposti käyä niin ette ihmiset jokka oon lähtösin mailman eri osista ymmärtävät toinen toista väärin.
Arvot oon se ääni meän sisälä joka ohjaa meän valintoja. Tämmösiä valintoja tehemä joka ikinen päivä.
Sie lähet koulhuun vaikket halua lukeat matematikkia siksi ko sie tiät ette se oon väärin skulkata.
Sie tiät ette sie häyt ilmottaat jos sie jou’ut rikkomhaan sopimuksen jonka sie olet tehny jonku kans.
Sie tiät ette se oon väärin varastaat kaupasta.
Attityydit oon sitä mitä met tehemä praksisissa. Se oon meän oma suhtaantuminen normhiin ja arvhoin jokka met olema oppinheet.
Yksi arvo oon esimerkiksi rehelisyys. Sie tiät ette sie piät olla rehelinen. Mutta se ette valittee olla rehelinen persoona, oon attityydi.
1 / 3
Valgets kvaler
Eettinen hunteeraus
Etikin ytimessä oon oikeasti siis se kunka sie ja mie kohtelemma toinen toista, ja miksi. Ko met valittemma kunka met kohtelemma muita, perustuvat meän valinat meän attityydhiin ja arvhoin.
Met hunteeraama elikkä mietiskelemä sitä mikä oon oikhein ja väärin vississä tilantheessa ennen ko tehemä valinan. Ushein kuvittelema erilaisia vaihtoehtoja ja niitten konsekvensia.
Lopuksi met päätämä sen mitä met haluamma tehä. Monesti se oon meän vaisto joka ohjaa meitä.
Tätä met kuttuma eettiseksi hunteeraukseksi. Eettistä hunteerausta tehemä koko aian.
1 / 3
En håndsrekning
Etikki arkipäivässä
Esimerkki:
Liisa käypi kaupassa koulun jälkhiin ja ostaa sukulaatin. Ko hän seisoo sukulaattihyllyn eessä hän näkkee vanheman miehen joka pisthäättää hammakreemituubin lummhaan.
“Mitä mie tehen nyt?”, ajattellee Liisa. “Piänkö puhuat sen miehen kans ja sanoat ette mie näin mitä hän teki? Tahi ilmotanko kaupan työtelijöile?
Miehelä oon kulunheet vaattheet päälä, ja Liisa arvelee ette miehelä ei ole paljon rahhaa. Hän tietää ette kauppa aina antaa kauppavarkhaukset ilmi pulettijale. Liisa tykkää syntiä miehestä. “Ei se hammaskreemituubi maksa niin paljon”, ajattellee Liisa. “Mutta …”
1 / 2
Illustrasjon av en jente som ikke vet hva hun skal velge.
Eettinen dilemma
Muutamisti sinun valinoila oon konsekvensit tyhä sinule.
Joskus niilä oon konsekvensit muileki.
Ushein oon vaikea tietäät mitä tehä. S e saattaa olla vaikea tietää mikä oon oikhein ja mikä oon väärin. Tätä met kuttuma eettiseksi dilemmaksi.
Tekispä Liisa mitä tahansa, se se tullee väärin jolleki. Mitä sillon pittää tehä?
Ko met jou’uma eettisheen dilemmhaan, met saatama alkaat eppäilemhään itteämmä. Sillon met häymä antaat aikaa ittelemä ja ajatella sen läpitte minkälaisia maholisuuksia meilä oon ja mikä olis vähhiiten väärin valita.
Mitä sie teksit jos sie olisit samassa tilantheessa ko Liisa?
Oletko sie koskhaan kokenu eettistä dilemmaa?
Puhu mielelä sen ympärit klassissa!
1 / 3
Kaltiot:
- Sagdahl, Mathea Slåttholm: etikk i Store norske leksikon på snl.no.
Hentet 29. oktober 2021 fra http://snl.no/etikk
Video- ja kaltiot:
-
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Skolerom
-
Getty Images
-
Skolerom
-
