Näin varmistamma, ette juomavesi riittää

Veđen puutet saattaa johtaat taistelhuin vesiresursiista. Kunka saatama kuluttaat vähemän vettä niin ette turvata mailmanrauhan ja samassa suojela meiđän planeettii?

Accessibility icon Näin varmistamma, ette juomavesi riittää

Met tarvittemma puhđasta vettä

Sie saatat pärjätä päivätolkula ilman ruvatta. Mutta ilman veđettä sie kuolet koko noppeesti. Siksi vesi oon upottoman tärkkeetä.

Nyt se alkkaa olemhaan liijan vähän puhđasta vettä saantheila mailmassa koska jokhainen meistä kuluttaa enämen vettä. Samassa ihmissii tullee lissää mailmassa.

Liijan korkkee veđenkulutus

Suuriiman osan veđestä piđethään muihin tarkoitukshiin ko juomisheen. Puunat pittäävät sitä ittensä pelttoin kastelemisheen.

Pohjais-Aafrikasta ja Keski-iđästä löyttyy vain 1 prosentti mailman veđestä, mutta sielä assuu yli 6 prosenttii mailman ihmisistä.

Tavalinen ihminen pittää nuoin 180 liitterii vettä päivässä. Yli puolet tästä mennee hyysikän viruttamisheen, dyssäämisheen ja vaatetpeshoon.

Vettä säästäävät toimet

Maanpruukissa tutkiijat kehittäävät kasvii mikkä kestäävät kuivuutta paremin. Het oon kans luonheet kamppheita mikkä kokkoovat sađetvettä.

Sinun huonheessa saatat säästäät vettä helppoin konstiin avula. Met saatama pittäät paremppii pesomasiiniita ja vaihettaat säästödysshiin. Näin met saatama ottaat huolen miljööstä paremin.

Konnonkokkoojat

Mailman kuiviimilla aloila konnosta saattaa saađa puhđasta vettä. Käyttämällä issoo verkkoo vettä saatethaan kovota liitterittäin.

Tuuli painaa konnon verkkoo vasten, ja vesi tippuu suurhiin astiissiin. Semmoissii “konnonkokkoojiita” löyttyy usheista paikoista mailmassa.

Ihmisten luomat jäätiköt

Kevväilä Himalayala vettä oon vähän. Muutama vuosi takaisin joukko tutkiijoita alkoi luomhaan keinotekoissii jäätiköitä. Veđen johđethaan putkee pitkin ja “syljethään” ulos niin ko truiskulähđet. Kylmässä ilmassa vesi jäättyy ko se puttoo. Aijan myöten jää karttuu ja haamustaa suuren tornin mitä käskethään stupaksi.

 Tiesitkö ette…

… met tarvittemma paljon enämen vettä kiini vuotheen 2050?

… faprikit pittäävät 75 prosenttii veđestä energiin luomisheen?

… pohjavesi jaukkuu ko met piđämä enämen vettä ko se mikä tullee satheena?

… se mennee 3000-5000 liitterii vettä kilon riisin produseeraamisheen ja 500 liitterii kilon poteetin produseeraamisheen.

Forrige avsnitt

1 / 4

Neste avsnitt

Vesipuutet mailmassa

Maan väkiluku kassuu ja se johtaa siihen ette meiđän juomaveđen häyđythään jakkaat yhä usheeman ihmisen ja elläimen kesken.

Joilaki aloila mailmassa vettä oon ajoittain aivan liikkaa ko taas muissa paikoissa vesi kuivuu. Ihmiset ja elläimet ei pärjää ilman puhthaatta ja hyvättä juomaveđettä.

En hånd som blar et ark med bilde av en tørr ørken slik at det kommer fram et ark med grønn natur.
En hånd som blar et ark med bilde av en tørr ørken slik at det kommer fram et ark med grønn natur.

Lähtheet:

  • Vitenskapens guide til jordens framtid (2018)
    ORAGE FORLAG AS

Kuvat ja videot:

    1. Getty Images
    2. Getty Images
    3. NRK Skole
    4. Getty Images
    5. BBC News – Youtube
    6. BBC News – YouTube
    7. Getty Images
    8. Getty Images