10 trinn til eit spennande intervju!

Å lese, sjå eller lytte til eit intervju med eit anna menneske kan setje i gang mange kjensler. Du kan bli inspirert, glad, engasjert, sint og irritert.

Dei beste intervjua er dei som vekkjer kjensler. Og dei dårlegaste – det er dei som er kjedelege og uinteressante. Desse intervjua gidd vi ikkje å lese, sjå eller høyre ferdig.

Her skal du lære korleis du lagar eit spennande intervju. Det er gøy for deg, den du intervjuar og dei som skal lese, sjå eller høyre intervjuet etterpå.

Forrige avsnitt

1 / 2

Neste avsnitt
Blokk og papir
Blokk og papir

1. Vit kva du lagar 

Ja, for kva er eigentleg eit intervju?

Eit intervju er ein journalistisk sjanger der ein person (journalisten) har ein samtale med eit anna menneske (intervjuobjektet). Målet er å få intervjuobjektet til å fortelje spennande eller viktige ting som skal presenterast vidare i ein reportasje.

Intervjuet blir publisert som levande bilete, lyd eller tekst. Den som les, lyttar eller ser, skal få vite noko om personen som blir intervjua.

Ung jente som noterer i en skrivebok.
Ung jente som noterer i en skrivebok.

2. Kven og kvifor? 

Kven skal du intervjue, og kva vil du at saka di skal handle om?

Dette kan starte i begge endar.

Du kan ha eit bestemt tema du vil vite meir om, og då må du finne ein person som kan seie noko om akkurat dette. Vi seier at du intervjuar ei kjelde som er ekspert på området. Kanskje blir vi litt kjende med personen samstundes?

Du kan òg intervjue ein bestemt person, kanskje fordi personen er kjend og mange vil vite meir om dette mennesket. Då kan du lage eit portrettintervju. Vanlegvis er ein slik person kjend fordi han eller ho er flink til noko, og kanskje blir dette eit tema i intervjuet?

Blokk og papir
Blokk og papir

3. Lag ein intervjuavtale 

Når du veit kven og kvifor du skal lage eit intervju, kan du ta kontakt med personen for å spørje om hen vil møte deg.

Då er det viktig at du fortel kven du er, kvifor du tek kontakt, kva slags sak det gjeld, og kvar ho skal publiserast.

Informer òg om du skal ta opp lyd, bilete eller video. Det er viktig at intervjuobjektet får all informasjon på førehand, slik at det ikkje blir misforståingar. Når du er tydeleg, får intervjuobjektet tillit til deg, og då kan hen opne seg meir.

Smilende gutt som snakker i telefonen.
Smilende gutt som snakker i telefonen.

4. Førebu deg skikkeleg! 

Å stille uførebudd til eit intervju er uaktuelt. Sjølv dei mest røynde og profesjonelle journalistane jobbar mykje før eit intervju.

Vel sjanger. Kva slags sak skal du lage? Er det til dømes eit portrett eller ei temasak?

Set deg inn i sjangeren og kva det er forventa at du skal få med.

Kven er målgruppa? Altså kven skal lese dette? Dette er faktisk viktigare enn mange trur. Når du veit kven du vil nå med reportasjen din, er det enklare å bestemme seg for kva du skal spørje om.

  • Gjer research om intervjuobjektet. Undersøk nettet, spør andre som kjenner hen, og spør familien.

    Du må vite viktige ting som kva personen jobbar med, om hen har oppnådd noko spesielt, kva hen kanskje er kjend for, og så vidare. Det gjer at du føler deg tryggare i intervjusituasjonen, og då kan intervjuobjektet slappe av.

  • Gjer research om tematikken. Dersom du skal fokusere på eit tema, må du ha god innsikt i kva det handlar om.

Forrige avsnitt

1 / 3

Neste avsnitt
Blokk og papir
Blokk og papir

5. Lag spørsmål på førehand 

Dette er sjølvsagt ein del av førebuingane, men får eit eige punkt. Det handlar nemleg ikkje berre om å setje opp ei liste med nokre spørsmål, men å arbeide fram gode, spennande spørsmål om ting som målgruppa har lyst til å vite. Dette kan løfte saka di frå bra til kjempebra.

Eit døme: Dersom du skal lage eit portrettintervju med ein artist, treng du ikkje bruke opp tida på å spørje kor mange songar hen har laga, eller kor gammal hen er. Det kan du finne ut på førehand.

Alt du kan finne på Google, treng du ikkje spørje om. Les òg andre intervju med personen, du treng ikkje spørje om det same. Finn på andre spørsmål, som:

Kvifor blei hen artist?
Kva er den beste opplevinga artisten har hatt i livet sitt?
Kva slags forhold har personen til venene sine etter at hen blei kjend?

Still spørsmål som du sjølv lurer på, samstundes som du hugsar på målgruppa.

Skriv ned alle spørsmåla. Det er mykje betre å ha for mange enn for få spørsmål.

Ein vanleg bommert er å stille spørsmål som startar med eit verb: «Var det gøy å spele i Oslo Spektrum i går?» Då kan du få svaret ja eller nei. Det er jo ikkje så spennande.

Still derfor spørsmål som startar med spørjeord som kven, kva, kvar, kvifor, når og korleis.

Set gjerne opp spørsmåla i ei rekkjefølgje med dei enkle og varsame spørsmåla først. Så kan du heller stille meir krevjande spørsmål etter kvart.

«Kvifor slo du opp med X?» er ikkje eit godt startspørsmål. Det kan du spare til de har blitt litt betre kjende.

Forrige avsnitt

1 / 4

Neste avsnitt

6. Ver deg sjølv 

Å intervjue eit anna menneske kan vere litt skummelt. Det er trass alt du som har teke initiativet og skal styre praten, så det er ikkje rart om du blir litt nervøs.

Hugs at når du er godt førebudd, og du har spørsmåla dine framfor deg, så kan det ikkje gå så gale. Det kan faktisk lette litt på stemninga dersom du fortel at du er litt nervøs og spent – ikkje minst viss det er første gong du gjer eit intervju. Ein blir ofte rolegare av å seie ting høgt. Ikkje gløym å smile! Du kjem langt med eit smil.

Radiointervju
Radiointervju

7. Ta notat eller gjer lydopptak 

Når nokon stiller til intervju, skal dei bli siterte korrekt. Det dei seier, må kome fram på den måten det blei sagt, og ikkje takast ut av samanhengen.

Ein teknikk mange brukar, er å gjere lydopptak av intervjuet. Du kan òg ta enkle notat undervegs. Då kan du notere eigne tankar, rørsler intervjuobjektet gjer, kva hen ser på når hen snakkar, og andre reaksjonar. Dette er fint å ha med i teksten.

Du skriv òg eit betre intervju dersom du kan skildre personen du har intervjua innimellom setningane.

Ein god gest er å la intervjuobjektet få lese, høyre eller sjå saka når ho er ferdig, slik at de begge er trygge på at det som kjem fram, er riktig.

Sei derfor at du kan sende ein sitatsjekk på e-post dersom det er ønskjeleg.

Forrige avsnitt

1 / 2

Neste avsnitt
Blokk og papir
Blokk og papir

8. Still oppfølgingsspørsmål 

Det gir meir liv og spennande innhald dersom du klarer å grave litt djupare i svara du får.

To svært vanlege og enkle oppfølgingsspørsmål er: «Kvifor eller korleis skjedde det?» og «Kan du fortelje litt meir om det?» Då får du forhåpentleg vite endå meir om det du lurte på, og det er bra for intervjuet.

Ikkje ver redd for stille. Det betyr berre at den du intervjuar, tenkjer seg om, og det er bra.

9. Lag ein disposisjon 

Dersom intervjuet skal skrivast som tekst, er det no den verkelege jobben byrjar. Samstundes, viss du har førebudd deg skikkeleg, har du eit kjempegodt grunnlag. Oppgåva blir òg lettare dersom du set opp ein disposisjon før du byrjar.

Det du treng til ei sak, er …

  • Tittel: Dette kan til dømes vere eit sitat, eller noko som fangar merksemda til lesaren med ein gong.
  • Ingress: Ein kort og freistande tekst som seier noko om kva lesaren kjem til å få lese lenger nede.
  • Byline: Namn på journalist, fotograf eller andre som har vore med.
  • Innleiing:

    Noko som presenterer temaet eller personen.

  • Hovudteksten: Set inn rekkjefølgja på kva du vil ha med i saka, ut frå kva de snakka om under intervjuet.
  • Avslutning:

    Det er lurt å vente med denne til du har skrive heile saka. Ho kan endre seg litt undervegs.

Forrige avsnitt

1 / 3

Neste avsnitt
Blokk og papir
Blokk og papir

10. Skriv så tastaturet får kjøyrt seg! 

No er det berre å skrive i veg. Følg disposisjonen så godt det let seg gjere. Du kan sjølvsagt gjere endringar undervegs. Det er ditt intervju, og du som bestemmer.

Hugs at det er fint å få med skildringar av intervjuobjektet. Skriv om staden de var, og kva personen hadde på seg. Skap bilete for dei som les. Dei har jo ikkje vore til stades under intervjuet.

Varier teksten med sitat og skildringar. Les alltid godt igjennom til slutt, og sjekk at du har fått med deg det innholdet du ønsker.

Tastatur laptop
Tastatur laptop

Kjelder:

Bilet- og videorettar:

    1. Getty Images
    2. Getty Images
    3. Getty Images
    4. Getty Images
    5. Getty Images
    6. Getty Images
    7. Getty Images
    8. Getty Images
    9. Getty Images
    10. Getty Images

Relaterte yrker

Synes du dette var spennende lesning? Her har vi forslag til noen yrker du kan utforske:

Journalist

Journalist
Fotojournalist

Fotojournalist
Forfattar

Forfattar
Close Icon

Loading...