Er det viktig å vere ein berekraftig gründer?
Ja, det er det! I dag må nesten alle som startar eller driv ei bedrift, tenkje på berekraft.
Begynn med å finne eit problem som treng ei løysing. Kanskje har du sett at folk i lokalsamfunnet treng hjelp? Kanskje du har høyrt om globale problem som klimaendringar og fattigdom? Du kan få mange gode idear viss du tar ein titt på berekraftsmåla til FN og ser på inspirerande filmar om oppfinningar.
Som gründer må du forstå kva berekraftig utvikling inneber. Verda treng nye produkt og tenester som kan løyse alt frå søppelproblem til sosiale utfordringar.
1 / 2
Berekraftig gründer
Mange vil kjøpe produkt som er laga på ein miljøvennleg måte. Viss du vil vere ein berekraftig gründer, bør du derfor lage eit produkt som ikkje skaper meir plast i havet eller blir laga ved hjelp av barnearbeid.
Å tenkje på berekraft betyr å ta omsyn til miljøet, til dei tilsette i bedrifta, og til samfunnet rundt deg.
Dei tre viktigaste elementa i berekraftig utvikling er:
- Klima og miljø – vi må stoppe klimaendringar og beskytte miljøet.
- Økonomiske forhold – vi må bekjempe fattigdom, skape økonomisk vekst for alle og fordele jordas ressursar rettferdig.
- Sosiale forhold – vi må sørgje for mangfald og inkludering, og sikre at menneskerettane blir følgde.
1 / 2
Korleis er du ein berekraftig gründer?
Å vere ein berekraftig gründer betyr ikkje at du skal redde verda aleine, men at du tar omsyn til miljøet, samfunnet og økonomien når du driv bedrifta di.
Viss produktet du sel kan brukast om igjen eller resirkulerast, forureinar du mindre. Viss bedrifta går bra, må du kanskje tilsetje fleire. Då sørgjer du for fleire arbeidsplassar, og det er fint for økonomien i landet.
Sosialt entreprenørskap
Det kan vera lurt å tenkje på korleis du kan hjelpe samfunnet når du skal starte di eiga bedrift. Kanskje du kan lage ein app som gjer eldre menneske mindre einsame eller som hjelper barn med leksene? Då bidreg ideen din til å løyse eit samfunnsproblem.
Dette kallar vi sosialt entreprenørskap, og det betyr at du er ein gründer som vil hjelpe ulike menneske i samfunnet.
1 / 3
Mangfald og inkludering er viktig
Mangfald og inkludering er viktig fordi det betyr at alle får sjansen til å jobbe, uansett bakgrunn, alder eller behov for tilpassing. Samfunnet blir meir rettferdig når alle har dei same moglegheitene.
Når folk med ulik bakgrunn får jobbe saman, utfyller dei kvarandre og gjer teamet meir kreativt. Då blir bedrifta di ein betre stad å jobbe!
Betre for bedrifta
Når tilsette med ulik bakgrunn jobbar saman, vil dei lettare kunne møte og forstå behovet til kundane betre. Då kan du lettare lage akkurat dei produkta som kundane vil ha, og det er bra for bedrifta di!
Betre arbeidsmiljø
I bedrifter der leiinga fokuserer på mangfald og inkludering, vil ein med stort sannsyn òg få eit betre arbeidsmiljø.
Dette vil i sin tur føre til at bedrifta vert ein populær stad å jobbe – og du vil tiltrekkje deg mange flinke folk!
Men mangfald og inkludering skjer ikkje av seg sjølv. Alle må bidra til å skape eit godt arbeidsmiljø.
Det er nøkkelen til suksess for deg, for bedrifta og for samfunnet vårt.
1 / 7
Du kan bidra!
Som gründer kan du spele ei viktig rolle i samfunnet viss du er flink til å tenkje på berekraft. Det er både morosamt og lønnsamt å vere med å løyse problem i samfunnet.
Til refleksjon:
- Kjem du på nokre behov i samfunnet som kan løysast gjennom sosialt entreprenørskap?
- Er du samd i det du har lest om mangfald og inkludering i denne artikkelen? Forklar kvifor.
- Kvifor trur du at nokre bedrifter ikkje tenkjer så mykje på mangfald og inkludering, sjølv om det er lønnsamt?
- Korleis kan du bidra til inkludering og mangfald?
