Er det viktig å vere ein berekraftig gründer?
Absolutt! Viss du skal starte eller drive ei bedrift i dag, må du tenkje på berekraft.
Alt begynner med eit problem som treng ei løysing. Kanskje du har lagt merke til at nokon i lokalsamfunnet treng hjelp? Eller kanskje du kan mykje om globale utfordringar som klimaendringar og fattigdom? Viss du tek ein titt på FNs berekraftsmål, eller nokre av dei inspirerande filmane som finst om nyskapande oppfinningar, kan du få mange idear til korleis du kan bidra.
Derfor er det heilt avgjerande for deg som vil bli gründer at du set deg godt inn i kva berekraftig utvikling betyr. Verda treng fleire produkt og tenester som bidreg til å løyse alt frå søppelproblem til sosiale utfordringar i samfunnet. Ei sosial utfordring kan til dømes vere at mange eldre er einsame, eller at norske ungdommar nesten har slutta å lese bøker.
1 / 2
Berekraftig gründer
Innanfor berekraftig utvikling er det eit stort behov, og dermed ein stor marknad for oppfinnsame gründerar. Folk blir stadig meir opptekne av at produkta dei kjøper, er produserte på ein berekraftig måte.
Derfor er det lurt å utvikle eit produkt som ikkje skaper endå meir plast i havet, eller som ikkje blir laga på ein fabrikk som driv med barnearbeid. Det å vere ein gründer med fokus på berekraft, betyr å ta omsyn til miljøet, til dei tilsette i bedrifta og til samfunnet rundt deg.
La oss ta ein kjapp gjennomgang av dei tre hovudelementa for berekraftig utvikling:
- Klima og miljø – vi må stoppe klimaendringane og redde miljøet.
- Økonomiske forhold – vi må ha fokus på å utrydde fattigdom, skape økonomisk vekst for alle, og sørgje for rettferdig fordeling av jordas ressurser.
- Sosiale forhold – vi må jobbe for å utjamne ulikheiter, sørgje for mangfald og inkludering og respektere menneskerettane.
1 / 2
Korleis er du ein berekraftig gründer?
Å vere ein berekraftig gründer betyr ikkje at du skal redde verda åleine. Men du må ta omsyn til hovudelementa innanfor berekraftig utvikling når du skal starte og drive di eiga bedrift.
Viss du til dømes skal selje eit fysisk produkt, bør du tenkje over korleis produktet kan gjenbrukast eller resirkulerast. Då sørgjer du for at bedrifta di ikkje bidreg til meir forureining.
Viss du har eit godt produkt eller sel ei teneste som mange vil kjøpe, kan bedrifta di bidra til økonomisk vekst i samfunnet. Høg etterspurnad etter ei vare eller ei teneste betyr meir arbeid, og då må du kanskje tilsetje fleire folk. Då bidreg du til sysselsetjing, som igjen gir økonomisk vekst.
Sosialt entreprenørskap
Det kan vere lurt å tenkje på sosiale forhold når du skal starte eiga bedrift. Det finst nemleg mange utfordringar som bør løysast i samfunnet vårt, så her har du mange moglegheiter til å finne ein god forretningsidé! Kanskje du kan lage ein samtale-app som gjer at eldre kjenner seg mindre einsame? Eller ein leksehjelp-app for skuleelevar? Då bidreg ideen din til å løyse eit samfunnsproblem.
Dette kaller vi for sosialt entreprenørskap. Ein entreprenør er nemleg det same som ein gründer. Når det dreier seg om bedrifta di, handlar sosiale forhold om mangfald og inkludering.
1 / 3
Mangfald og inkludering er viktig
Mangfald og inkludering på arbeidsplassen handlar om å gi alle moglegheit til å vere ein del av arbeidslivet – uansett kjønn, etnisitet, alder, seksuell orientering, religion eller funksjonsnivå.
Dette er utruleg viktig og verdifullt, både for den personen som blir tilsett og for bedrifta som tilset. Når alle får moglegheit til å ta del i arbeidslivet, bidreg det til å jamne ut sosiale forskjellar i samfunnet. Dette er eitt av måla innanfor berekraftig utvikling.
La oss sjå på nokre gode grunnar til at mangfald og inkludering styrkjer bedrifta di.
Kreative løysingar
Når du samarbeider med andre menneske som har ein annan bakgrunn enn deg, vil folk ha ulike tankar og idear. Då vil det òg dukke opp fleire nye idear og moglege løysingar på dei utfordringane du møter. Dette er bra for bedrifta!
Fleire flinke folk
I bedrifter der leiinga fokuserer på mangfald og inkludering, vil ein mest sannsynleg òg få eit betre arbeidsmiljø. Dette vil i sin tur bidra til å gjere bedrifta til ein populær stad å jobbe. Ein populær arbeidsplass med eit godt, kreativt og nyskapande arbeidsmiljø, vil ganske sikkert tiltrekkje seg mange flinke folk.
Kundane dine
Ei bedrift med eit mangfald blant dei tilsette vil òg tiltrekkje seg eit mangfald av kundar, rett og slett fordi du har eit betre utgangspunkt for å forstå ei variert kundegruppe. Denne forståinga gjer det enklare å tilpasse produktet eller tenesta di, slik at kundane dine får akkurat det dei treng. Det er lønnsamt for bedrifta di, og det er verdifullt for kundane dine.
Gode avgjerder
Når menneske som er veldig ulike skal finne gode løysingar saman, utfordrar dei gjerne kvarandre sine idéer og meiningar fordi dei tenkjer ulikt. Dette kan føre til meir gjennomtenkte og effektive løysingar og avgjerder.
Kulturell beriking
Mangfald gir deg moglegheit til å lære om andre kulturar og tradisjonar. Inkludering handlar ikkje berre om å tilsetje folk med ulik bakgrunn, men òg om å skape ein kultur der folk respekterer og set pris på desse forskjellane. Når vi respekterer kvarandre, kan vi lære av erfaringane til kvarandre og bruke dei i arbeidet vårt.
Mangfald og inkludering skjer ikkje av seg sjølv. Alle må bidra til å skape eit miljø der kvar og ein kjenner seg inkludert og respektert. Først då får ein eit verkeleg godt arbeidsmiljø, og det er nøkkelen til suksess for deg, for bedrifta og for samfunnet vårt.
1 / 7
Du kan bidra!
Som gründer har du moglegheit til å spele ei viktig rolle for samfunnet. Berre hugs at du må tenkje på berekraftig utvikling – heile vegen frå forretningsidé til etablert bedrift. Det er både givande og lønnsamt å bidra til å løyse eit samfunnsproblem.
Til refleksjon:
- Kan du komme på nokre behov i samfunnet som kan løysast med hjelp av sosialt entreprenørskap?
- Er du samd i det du har lese om mangfald og inkludering i denne artikkelen? Begrunn synspunkta dine.
- Kvifor trur du at mange bedrifter ikkje tar særleg omsyn til mangfald og inkludering, sjølv om forsking viser at det lønner seg?
- Korleis kan du bidra til inkludering og mangfald?
