Bli kjend med marknaden din
Tenk deg at du har ein skikkeleg god idé. Ein idé som du vil dele med andre og tene pengar på. Er det ikkje berre å setje i gang?
Det er nok ikkje så enkelt. Først må du sjekke om folk liker ideen din og er villige til å betale for den. Vi seier at du må finne ut om det finst ein marknad for produktet eller tenesta di.
Finst det ein marknad
for idéen din?
Tenk deg at du vil begynne med snømoking og hagearbeid for naboane for å tene litt ekstra.
Viss du har få naboar som har ein hage, vil du ikkje få så mange kundar. Dessutan må du kjøpe utstyr som snøskuffe og hagereiskap.
Det kan bli mange utgifter og lite inntekter.
Er det plass til deg
og idéen din?
Har du lyst til å bli strikke-influensar? Mange strikke-influensere gjer det bra. Er det plass til ein til?
Du bør òg undersøkje om det finst ein marknad for ideen din. Viss ingen synest det er vanskeleg å skrelle ein mango, er det ikkje så lurt å lage ein mangoskrellar.
Gjer ein marknadsanalyse før du set i gang. Då finn du ut om mange er interesserte i ideen din.
Kva er ein marknadsanalyse?
Det treng ikkje vere så vanskeleg å gjere ein marknadsanalyse. Spør folk om dei kunne tenkje seg å kjøpe produktet ditt, og kva dei eventuelt vil betale.
Spør gjerne om dei har spesielle ønske og behov, slik at du kan tilpasse tenesta di.
Hugs at det er lurt å snakke med folk som kan bli kundar i framtida. Viss du vil hjelpe eldre med å handle mat, bør du snakke med eldre menneske.
Skil deg ut
Søk på nett, eller finn ut mest mogleg om konkurrentane dine på andre måtar. Viss det allereie finst eit firma som tilbyr liknande tenester, må du prøve å vere betre enn dei. Kanskje du kan vere billigare, raskare eller levere oftare.
Du må gi kundane gode grunnar til å velje akkurat deg.
Test produktet
La gjerne ei lita gruppe kundar teste produktet ditt før du sender det ut på marknaden.
Sel du smoothies? La folk smake.
Sel du ein dings? La folk teste den!
Då finn du ut om noko ikkje fungerer slik du forventa, og du får moglegheita til å forbetre produktet ditt før du sender det ut på marknaden.
1 / 3
Marknadsanalytikar
Intervjua og testane du gjer, fortel deg om det finst ein marknad for ideen din. Du vil òg finne ut om du bør gjere noko annleis, slik at ideen din blir meir interessant for kundane.
Mange bedrifter har eigne marknadsanalytikarar. Dei samarbeider med dei som utviklar nye produkt for å undersøkje om det finst ein marknad for dei.
Marknadsanalytikarar jobbar på fleire ulike måtar. Dei kan gjere spørjeundersøkingar, eller snakke med folk om kva dei synest om eit produkt. Dei kan òg la folk prøve eit produkt for å sjå kva dei synest. Til slutt analyserer marknadsanalytikarane alle svara for å sjå om det lønner seg å prøve å selje produktet.
Det finst eigne selskap som driv med marknadsanalysar på oppdrag frå andre bedrifter.
Korleis blir du marknadsanalytikar?
Det finst fleire måtar å bli marknadsanalytikar på. Dei fleste studerer marknadsføring, statsvitskap, journalistikk eller kommunikasjon.
1 / 3
Til refleksjon
Sjå på nokre tenester og produkt som allereie finst. Kvifor trur du dei er populære?
Ta til dømes Skolerom.no.
- Kven trur du dei snakka med før dei starta tenesta?
- Kva trur du var viktige ting for dei å tenkje på?
