Bli kjend med marknaden din
Tenk deg at du har komme på noko du meiner er ein skikkeleg god idé. Ideen din er faktisk så god at du har lyst til å dele han med resten av verda og tene pengar på han. Er det ikkje berre å setje i gang, då?
Nei, så enkelt er det nok ikkje. For sjølv om du meiner at du har ein kjempegod idé, så er det ikkje sikkert andre er samde med deg. Derfor må du finne ut om folk liker ideen din og er villige til å betale for han. Du må med andre ord finne ut om det er ein marknad for produktet eller tenesta di.
Finst det ein marknad
for idéen din?
Førestill deg at du vil påta deg snømoking og hagearbeid i nærmiljøet ditt. Det høyrest ut som noko du kan tene pengar på, ikkje sant?
Men viss det er få som faktisk har hage i nabolaget, er det ikkje sikkert marknaden din er stort nok til at ideen vil lønne seg. Kanskje du må ta buss for å komme deg til folk som har hage, og bussbilletten kostar pengar. Dessutan må du kanskje kjøpe både grasklippar, kjeledress og snøskuffe. Det kan bli mykje jobb for lite pengar.
Er det plass til deg
og idéen din?
Tenk deg at du gjerne vil bli strikke-influensar. Det finst fleire handarbeids-influenserar som gjer det veldig bra, men er det plass til deg òg?
Det bør du undersøkje før du kastar deg ut i det. Dessutan bør du undersøkje om det er ein marknad for ideen din. Viss ingen eigentleg synest det er vanskeleg å skrelle ein mango, er jo ikkje ein mangoskrellar ein særleg god idé.
Nettopp derfor er det lurt å gjere ein marknadsanalyse før du set i gang. Då undersøkjer du kor mange som kan vere interesserte i tenesta eller produktet ditt.
Kva er ein marknadsanalyse?
Det høyrest kanskje vanskeleg ut å gjere ein marknadsanalyse, men det treng ikkje vere så komplisert. Begynn med å spørje folk rundt deg om dei er villige til å kjøpe produktet ditt, og kor mykje dei vil betale for det.
Spør gjerne om dei har nokre spesielle ønske og behov – det kan hjelpe deg å utvikle ideen din endå meir.
Hugs at det er lurt å spørje folk som kan bli kundar i framtida. Viss planen din er å tilby ei teneste der du handlar inn mat for eldre menneske, er det ingen vits i å snakke med folk på din eigen alder.
Skil deg ut
Søk på internett, eller snakk med folk for å finne ut så mykje du kan om konkurrentane dine. Viss det allereie finst ei bedrift som handlar inn for eldre menneske, må du kanskje gjere det billigare, raskare, fleire gonger i veka, eller tilby deg å setje matvarene i kjøleskapet i tillegg.
Det er viktig å skilje seg ut i marknaden, for du må gi kundane gode grunnar til å velje akkurat di teneste eller ditt produkt.
Test produktet
Nokre gongar kan det vere lurt å la ei lita gruppe kundar teste produktet ditt før du sender det ut på marknaden.
Skal du selje smoothie? La nokon få smake først! Viss du vil tilby ein ny dings, kan du kanskje lage ein enkel modell. Viss det viser seg at dingsen ikkje fungerer godt for venstrehendte, er det lurt å oppdage det før du lagar 50 000 stykke av den.
Då får du sjansen til å forbetre produktet ditt før du begynner å selje det.
1 / 3
Marknadsanalytikar
Intervjua, undersøkingane og testane du gjer, vil gi deg ein god peikepinn på om det finst ein marknad for ideen din. Ein slik marknadsanalyse kan òg vise deg om du bør vidareutvikle ideen, slik at produktet eller tenesta blir endå meir interessant for kundane.
Mange bedrifter har eigne marknadsanalytikarar. Marknadsanalytikaren samarbeider med dei som utviklar nye produkt og tenester for å undersøkje om det finst ein marknad for ideane deira.
Marknadsanalytikarane gjer undersøkingane sine på mange ulike måtar. Dei kan sende ut spørjeundersøkingar eller intervjue folk om korleis dei brukar ulike produkt, eller kva dei synest om ei teneste.
Dei kan òg la folk teste eller smake eit produkt for å sjå kva dei synest. Til slutt analyserer marknadsanalytikarane alle svara slik at sjefen for selskapet kan sjå om det lønner seg å prøve å selje produktet.
Det finst òg eigne selskap som berre driv med marknadsanalysar på oppdrag frå andre bedrifter.
Korleis blir du marknadsanalytikar?
Det er fleire ulike utdanningar du kan ta viss du vil bli marknadsanalytikar. Det vanlegaste er å utdanne seg innan marknadsføring, men mange marknadsanalytikarar har òg utdanning i statsvitskap, journalistikk eller kommunikasjon.
1 / 3
Til refleksjon
Sjå på nokre forretningsidear som allereie eksisterer. Kvifor trur du at mange vil ha denne tenesta/dette produktet?
Ta utgangspunkt i Skolerom.no. Kven trur du menneska bak Skolerom snakka med før dei lanserte denne tenesta? Kva trur du var viktig for dei å tenkje på?
