Kva er du
interessert i?
Drøymer du om å skaffe deg ein morosam, meiningsfylt og utfordrande jobb? Det er bra! Då har du eit skikkeleg godt utgangspunkt for å bli ein gründer. Ein gründer er ein person som startar si eiga bedrift, men først må ein ha ein god idé.
Eller helst mange gode idéer. Viss ein vil bli ein gründer, kan det nemleg vere smart å ha meir enn berre éin god idé. Ofte kan ein idé verke kjempelur med ein gong ein kjem på den, men etter kvart finn ein ut at den kanskje ikkje er så god likevel. Då er det smart å ha ein plan B.
Motivasjon
Kva er du mest interessert i? Er det dataspel, sport, miljøvern, musikk, matlaging eller sminke? Viss du skal lykkast som gründer, er det lurt å jobbe med noko du brenn for.
Viss du jobbar med noko du liker, blir jobben både morosamare og meir motiverande. Det er òg ein stor fordel å jobbe med noko du kan mykje om.
Kva er ein god idé?
Kva er det som gjer ein idé god? Først og fremst bør ein god idé vere noko nytt, noko som dekkjer eit behov, eller løyser eit problem. Begynn med å observere verda rundt deg. Sjå etter ting som ikkje fungerer, eller som kan forbetrast. Det kan vere alt frå store, globale utfordringar, som klimaendringar, til små kvardagsproblem, som å miste nøklar eller skrelle ein mango (for det er faktisk skikkeleg vanskeleg).
Korleis finne ein god idé?
Sjå deg rundt i kvardagen. Bur det mange familiar med hund i nærleiken som kan ha behov for hjelp til å gå tur med hunden sin? Kunne dei ha trunge ein leksehjelp-app på skulen? Eller ein app som kan gjere det lettare å dele på utgiftene når de handlar saman?
Kva andre behov legg du merke til blant folk? Kva saknar du sjølv? Hald auga og øyra opne! Snakk med folk, og spør om dei har tenkt på noko som kunne ha gjort kvardagen deira enklare. Lat deg inspirere av verda rundt deg!
1 / 2
Kreativitet er nøkkelen
Når du har funne eit behov eller eit problem, kan du begynne å tenkje på korleis du kan løyse det. Det er her den gode idéen din gøymer seg.
Ein god dose kreativitet er nøkkelen til å finne løysinga. Heldigvis er det ikkje sånn at kreativitet anten er noko ein har, eller ikkje har. Somme er kanskje meir kreative enn andre, men alle kan finne ei god løysing på eit problem!
Idéprosess
Ikkje sit og vent på at ein god idé skal dukke opp heilt av seg sjølv. Jobb aktivt for å finne han! Det er fleire nyttige måtar å gjennomføre ein idéprosess på, finn den som passar deg best. Og hugs, ingen idéar er dårlege eller feil i begynnelsen av idéprosessen din – bruk fantasien! Det viktigaste er å vere open for nye perspektiv og ikkje vere redd for å utforske sjølv dei mest uvanlege ideane. Nokre gongar kan dei raraste tankane føre til dei mest geniale løysingane.
Å komme i gang
Berre begynn ein stad – kvar som helst. Tenk på noko som interesserer deg, til dømes musikk, og skriv ned alt du kjem på som har med musikk å gjere. Då set du i gang fantasien, og etter kvart kjem den kreative flyten du treng for å finne ein god forretningsidé. Lat oss sjå nærare på ulike idéprosessar.
Idémyldring
Lat tankane springe fritt, og skriv ned alle moglege idéar som poppar opp i hovudet ditt på eit blankt ark. Dette kan du gjerne gjere saman med andre, kanskje de blir inspirerte av kvarandre?
Tankekart
Tenk deg at du vil løyse eit samfunnsproblem, som til dømes matsvinn. Finn fram eit stort, tomt ark, og skriv «matsvinn» midt på arket. Skriv ned alle ord du kjem på som har direkte med matsvinn å gjere, og alt du forbind med desse orda. Det hjelper deg å sjå samband og moglegheiter du kanskje ikkje ville ha oppdaga elles.
Spørsmål og observasjon
Still deg sjølv spørsmål som «Kva om …?» og «Korleis kan vi …?» Observer omgivnadene nøye, og prøv å oppdage problem som treng smarte løysingar. Lat oss sjå på nokre døme:
- Kva om det fanst ein dings som skrellar mango for oss?
- Korleis kan vi redusere matsvinn?
- Kva om det fanst eit spegel som fortel deg at du er bra nok som du er kvar morgon?
- Korleis kan vi gi leksehjelp heime til alle som har behov for det?
- Korleis skal vi bruke mindre plast?
1 / 6
Lat deg inspirere av andre!
Sjå på eksisterande idéar eller produkt. Tenk på korleis du kan endre, tilpasse, eller kombinere dei for å skape noko nytt og kanskje endå betre enn det som allereie finst. Sjå på Google til dømes. Google var ikkje den første søkjemotoren. Nokon ville forbetre noko som allereie eksisterte, og så skapte dei ein søkjemotor som i dag er den beste på marknaden. Google har til og med vorte eit eige verb for å søkje på internett!
Lær av andre gründerar
Finn ut kva andre gründerar har gjort for å lykkast. Lær av kva dei har gjort rett – og ikkje minst av kva dei har gjort feil! Bruk andre sine erfaringar når du skal løyse dei problema som dukkar opp på vegen mot å bli ein gründer.
Ikkje feil å feile
Ikkje ver redd for å prøve og feile. Sjå på det som ein del av prosessen når ikkje alt går heilt etter planen. Dei aller fleste gründerane opplever å feile på ein eller annan måte. Det viktigaste er at ein lærer av feila sine og prøver igjen. Hugs at ein får mykje kunnskap og erfaring på denne måten. Det å vere ein gründer handlar mykje om å vere uthaldande og lære av eigne erfaringar. Derfor kan vi seie at det er fint å feile.
Museum of Failure
Det finst faktisk eit eige museum for skikkeleg elendige idéar! Her kan ein lære om store internasjonale selskap som har forsøkt seg på nye produkt og gått på ein grundig smell.
Utforsk ulike idéar
Mange merkelege idéar har utruleg nok vorte kjempesuksessar. Ikkje avgrens deg sjølv! Tenk stort, ellevilt, lite, rart, pussig, morosamt eller praktisk – bruk fantasien!
Kan du finne nokre gode døme på rare idéar som har vorte superpopulære?
1 / 3
Næringslivets Petter Smart!
Gründarar er litt som Petter Smart. Dei ser eit behov eller eit problem og finn smarte måtar å løyse dei på. Alt er mogleg!
Nå veit du litt meir om korleis du kan få ein god idé. Viss du drøymer om å starte di eiga bedrift, kan du òg bli ein gründer. Tek du utfordringa?
Til refleksjon
Kvifor er det viktig at nokon blir gründerar?
- Kjem du på nokon produkt eller tenester som vi er nesten avhengig av no, men som ikkje fanst for fem, ti og 20 år sidan?
