Når du har gjort dette, vil du sitje igjen med eit kart over teksten din. Finn ein læringspartnar og spør om du kan dele ideane dine med han/henne. Det er ofte lurt å snakke seg gjennom ideane sine. Kanskje du får nokre gode innspel av læringspartnaren din òg?

No skal du starte sjølve skrivearbeidet. Nokon liker å skrive det siste avsnittet i forteljinga først. Andre startar med innleiinga. Ikkje vêr for kritisk undervegs, men våg å leike deg med både innhald og språk. Du kan alltids rette opp etterpå. Undervegs kan det vere lurt å lese oppgåva igjen, berre for å sjekke at du framleis svarar på det oppgåva spør etter.

Gode skriverammar som kan hjelpe deg undervegs finn du her:

• Spenningsforteljing
• Forteljing 

Innleiing:
Forsking viser at det er sunt for barn å gå til skulen. Det er sunt for både hovud og kropp å få rørsle og frisk luft før ein set i gang med det viktige læringsarbeidet. Desse forskarane gjekk nok ikkje på Ekornbakken skule sånn som meg. Skoleveien til Ekornbakken er både skummel og farleg for oss skulebarn, men også for bilistane langs vegen. Når har kommunen tenkt til å gjere noko? Er det ikkje litt dumt å vente til det skjer ei alvorleg ulykke før ein sørger for at barna får ein trygg skuleveg?

Når det gjeld avslutninga di, skal ho fungere som ei oppsummering. Her skal du kort fortelje att lesaren din kva du har sagt. Avslutninga bør henge saman med innleiinga di og fungere som eit svar på denne.

Avslutning
Som vi har sett er det mange gode grunnar til at ein bør gå til skulen. Det er sunt for både kroppen og hovudet. På den andre sida er det ikkje noko ein skal gjere med livet som innsats. Viss skulevegen ikkje er trygg for skulebarna, så er det ikkje forsvarleg å la barna gå til skulen. For at barna skal få den beste starten på skuledagen sin, er det med andre ord viktig at kommunen sørger for at vegen er trygg – både for skulebarn og for bilistar. For barna på Ekornbakken handlar dette både om lys og om tilgang til fortaua. Alle er samde om at barna må ha ein trygg skuleveg – no er det kommunen som må sørge for at dei faktisk får det!

Sjå der, ja – ein ferdig argumenterande tekst! For å sikre at du har svart på det oppgåva spør etter er det no lurt å få ei vurdering av ein læringspartnar før du leverer.

Og du – hugs å sjekke rettskriving og teiknsetting før du leverer, då. Det er så kjipt viss det skal øydelegge den gode skrivejobben du har gjort. Undervegs i skrivinga er det lurt å bruke ressursar som kan hjelpe deg vidare. Dette kan til dømes vere gode setningsstartarar, planleggingverktøy og skriverammar.