Sex i mente | Kva skjer i puberteten?
Meir hår og lukt!
Hår på nye stader og sterkare kroppslukt. Kva er poenget med dette?
Dette er artikkel 2 i artikkelserien «Kva skjer i puberteten?» Det er i alt fem korte artiklar i serien, som tar for seg sentrale endringar unge gjennomgår i puberteten.
Hårvekst
Meir hårete med åra?
Vi får faktisk ikkje fleire hårstrå på kroppen i puberteten, men håret endrar seg frå tynt og fint hår, til kraftigare og meir synleg hår. Det er hormonet testosteron som gir meir hårvekst i puberteten. Sidan gutar har meir testosteron enn jenter, får dei også kraftigare hårvekst.
Alle får hår under armane, og dei fleste får meir hår på beina og armane. Nokon får meir hår på magen òg, gjerne som ei stripe frå trusekanten og opp mot navlen. Gutar og menn kan få hår på brystet, skuldrene og ryggen i tillegg. Det varierer kvar og kor sterk hårvekst ein får på kroppen.
Skjegg
Gutar og menn får skjegg.
Nokon får mykje skjegg, og andre mindre. Skjegg finst i ulike fargar, akkurat som håret på hovudet. Nokon vel å barbere bort skjeggvekst, medan andre vel å la skjegget gro – kanskje trimme på ein spesiell måte.
Skjegg kan også vere moteriktig! Kanskje du skal ha kinnskjegg, fyldig heilskjegg, bart eller ein liten goatee når du blir stor?
Kjønnshår
Alle får kjønnshår rundt kjønnsorgana. Det veks på kjønnsleppene, på ballane og ovanfor og rundt penis. Dei fleste får også hår i rumpesprekken. Kjønnshåra er ofte litt tjukkare og grovare enn hår ein har på hovudet.
Vi har kjønnshår fordi det held på lukt frå kjønnsorgana, hjelper til med at ein ikkje skal fryse eller sveitte og hindrar gnissing. Hårsekkane som kjønnshåret sit fast i, har også nerveceller som merkar rørsle, noko som kan kjennast godt når ein har sex.
Barbere bort kjønnshår?
Mange lurer på om dei skal barbere bort kjønnshåra.
Både reklame og porno viser stort sett kroppar utan kjønnshår, og då kan ein tru at dette er det normale. Nokon kan kjenne seg pressa til å barbere seg nedantil, anten rundt «bikinilinja» eller å barbere bort alt.
Å barbere seg på og rundt kjønnsorganet kan gi små kutt og betente hårsekkar. Det er vanleg å få raude nuppar, og nokon får små kviser.
Det klør når håret veks ut igjen, og det kan vere ubehageleg fordi huda kan bli tørr og sår.
Å barbere seg er valfritt, og ingen skal kjenne seg pressa til noko dei eigentleg ikkje har lyst til. Mange vel heller å frisere håret – altså klippe det litt, medan andre vel å la det vere som det er.
Her kan du sjå ein film der Line på Newton fortel meir om håra på kroppen:
https://tv.nrk.no/serie/newton-pubertet/sesong/1/episode/DMPV74100415#t=27s
Du kan lese meir om å barbere seg nedantil, såkalt intimbarbering, på Sex og samfunn og Ung.no. Her kan du også lese om andre måtar å fjerne kroppshår på.
https://sexogsamfunn.no/kropp/intimbarbering/
https://www.ung.no/kropp/2723_Skal_du_fjerne_hår_eller_ikke.html
1 / 7
Sveitte og kroppslukt
Når du kjem i puberteten, blir også lukta di forandra! Du begynner å sveitte meir, og sveitten rundt underlivet og i armholene luktar annleis.
Flaut
Nokon synest dette er veldig flaut, og at både lukt og sveitteringar under armane kan vere litt pinlege. Då er det lurt å hugse på at å sveitte er heilt naturleg, og veldig viktig for oss menneske. Å sveitte nedkjøler oss når vi blir varme. Utan å sveitte kan vi rett og slett bli overoppheita, altså altfor varme.
Kor mykje ein sveittar varierer frå person til person. Kvar på kroppen ein sveittar mest varierer òg.
Tåfis
Mange begynner også å sveitte meir på føtene i puberteten. Fotsveitte, altså tåfis, kan lukte ganske sterkt. Som med all anna form for sveittelukt, er det reinslegheit som hjelper. Vask føtene, byt sokkar kvar dag, og pass på at skoa dine tørkar ordentleg om dei har vorte våte.
God hygiene
For å forhindre sveittelukt er det viktig å vaske seg godt kvar dag og dusje etter trening eller andre aktivitetar ein blir sveitt av. Bruk gjerne deodorant som reduserer sveittelukt eller antiperspirant som gjer at ein sveittar mindre. Mange produkt er både deodorant og antiperspirant. Om du får sår hud av deodoranten, kan du prøve ein deodorant utan parfyme.
Byt sokkar og undertøy kvar dag, og gjerne T-skjorte og genser òg. Lukt blir sitjande i klede, så det er viktig å ta på seg reint tøy.
1 / 4
Her kan de sjå korleis Karim på PubertetsCamp opplever at kroppen får nye lukter:
https://tv.nrk.no/serie/pubertetscamp/sesong/1/episode/MSUB60000919
Kjelder:
https://www.ung.no/kropp/pubertet/2245_Svette.htmlhttps://lille.snl.no/pubertet
https://lille.snl.no/pubertet
https://sexhandbok.skeivungdom.no/temaer/helse/intimbarbering/
Bilde- og videorettar:
-
-
Helene Brox
-
Adobe Stock
- www.nrk.no
-
