Talgkjertlar

I huda har vi små kjertlar som lagar talg. Talg er ein type feitt som vernar huda. Kjertlane er vanlegvis opne, slik at talga kjem ut. Viss ein talgkjertel blir tett, blir kjertelen fylt med talg. Tette talgkjertlar blir kalla for hudormar.

Av og til får ein betennelse i ein tett talgkjertel. Kjertelen blir då hoven og raud, som ein liten, raud kul. Etter kvart får vi gult puss i kulen. Det er dette som er ei kvise.

Hormona har skulda

Grunnen til at dei fleste får kviser og hudormar i puberteten, er at hormon får kjertlane til å lage meir talg. Då får ein feitare hud. Når kjertlane lagar meir talg, er det større sjanse for at kjertlane blir tette og blir til hudormar eller kviser.

Kviser og hudormar er heilt normalt

Det er viktig å hugse at kviser ikkje smittar. Det er heller ikkje slik at ein får kviser fordi ein er ureinsleg eller et feil mat. Kviser kjem av hormon som påverkar huda i puberteten.

Dei aller fleste ungdommane får kviser, nokon får få, og nokon får mange. Når ein blir eldre, forsvinn vanlegvis kvisene.

Ikkje klem på kvisene

Det kan vere freistande å poppe kviser eller klemme ut innhaldet i hudormar. Eit godt råd er å ikkje falle for freistinga. Å klemme på kviser og hudormar aukar nemleg risikoen for å få arr og infeksjonar.

Kva kan du gjere?

Dersom du er plaga med mykje kviser, og om dei gjer vondt, kan du få hjelp hos legen. Legen kan skrive ut resept på medisinar mot kviser. Ein kan også få hjelp og gode reinsekremar på apoteket.