Talgkjertlar

Vi har små kjertlar i huda som lagar talg. Talg er ein type feitt som vernar huda. Viss ein talgkjertel blir tett, blir kjertelen fylt med talg, og då blir han kalla ein hudorm.

Av og til blir ein tett talgkjertel betent. Då blir han hoven og raud og blir fylt med gult puss. Det er dette som er ei kvise.

Hormona har skulda

Dei fleste får kviser og hudormar i puberteten fordi hormon får kjertlane til å lage meir talg. Då får ein feitare hud, og sjansen er større for at kjertlane blir tette og blir til hudormar eller kviser.

Kviser og hudormar er heilt normalt

Hugs at kviser ikkje smittar, og at kviser ikkje kjem av at ein er ureinsleg eller et feil mat. Kviser kjem av hormon som påverkar huda i puberteten.

Dei fleste får kviser i puberteten – nokon får fleire enn andre, men dei forsvinn som regel når ein blir eldre.

Ikkje klem på kvisene

Det kan vere freistande å klemme på kviser og hudormar, men du bør ikkje gjere det. Då aukar nemleg risikoen for å få arr og infeksjonar.

Kva kan du gjere?

Legen kan hjelpe deg viss du har mange og plagsame kviser. Ein kan også få hjelp og gode reinsekremar på apoteket.