Sex i mente:
Onani
Å onanere er heilt normalt og noko mange gjer.
Å onanere er som å ha sex med deg sjølv. Du gir deg sjølv nyting. Det er sunt, godt og ein fin måte å utforske kroppen sin på. Slik finn du ut kva du liker.
En illustrert figur som er naken nedentil og studerer penisen sin.
Korleis onanerer ein?
Når ein onanerer, tar ein på kjønnsorganet sitt, slik at det kjennest godt. Ein kan ta på, stryke, gnikke, massere eller klemme på og rundt kjønnsorganet.
Vulva, vagina og klitoris
Klitoris er veldig kjenslevar når du tek på han. Klitoris har vi faktisk berre for nyting! Ein kan gni eller kile framfor eller på sida av klitoris. Skjedeopninga og kjønnsleppene kan også masserast. Om ein vil, kan ein ta ein eller fleire fingrar inn i skjeden samtidig. Det går også an å bruke ein vibrator.
Slik ser klitoris ut: Sjå illustrasjon
Visste du at klitoris er som eit isfjell, der berre litt av han stikk ut av kroppen?
Lær meir om klitoris i denne filmen:
Penis
Penishovudet er veldig kjenslevart. Ein kan halde rundt penis og dra handa fram og tilbake over penis og penishovudet. Om ein er omskoren, slik at forhuda er operert bort, kan ein bruke fingrane eller handflata på penishovudet. Det kan vere lurt å ta litt glidekrem eller babyolje i handa slik at det glir betre.
Erogene soner
Vi har fleire ekstra kjenslevare stader på kroppen som det er godt å berøre. Dette kallar vi erogene soner. Døme er munnen, øyreflippane, nakken, brystvortene, rumpa, mellom låra, føtene, tærne, klitoris og penis.
Ein kan undersøkje kva delar av kroppen det er ekstra herleg å stryke og kile på eller å massere. Desse stadene kan ein ta på samtidig som ein onanerer.
Seksuelle fantasiar
Somme fantaserer samtidig som dei onanerer. Ein kan sjå for seg bilde eller situasjonar som ein blir kåt av.
1 / 6
Kor ofte er det vanleg å onanere?
Alt mellom aldri og dagleg er normalt. Nokre onanerer kvar dag, nokre kvar veke eller kvar måned, og andre ein sjeldan gong eller aldri.
Kvifor onanerer ein?
Ein onanerer først og framst fordi det kjennest godt. I tillegg kan ein få utløysing og orgasme.
Orgasme gir ei herlig kjensle fordi hjernen lagar ulike lykkestoff som han sender rundt i kroppen.
Sjølve orgasmen er musklar i kjønnsorganet som trekkjer seg saman, og det er dette som kjennest herleg.
Ein onanerer også for å lære meir om seg sjølv. Det er fint å bli kjend med seg sjølv før ein har sex med andre. Å onanere er ein heilt normal måte å utforske kroppen sin på og oppdage kva som kjennest godt.
1 / 2
Onanere åleine eller saman?
Det vanlegste er å onanere åleine, i senga si eller i dusjen heime.
Det er ikkje lov å onanere framfor nokon som ikkje har sagt det er greit. Ein bør heller ikkje onanere ein stad der det kan komme inn andre som ser.
Ein kan onanere andre eller kvarandre.
Det kan vere ein fin måte å bli kjend med kva andre liker av berøringar. Hugs at dette krev samtykke – altså at ein har blitt samde og har sagt ja.
1 / 2
To illustrerte figurer som er nakne nedentil. En mann og en kvinne.
Kan onanering vere skadeleg?
Nei, onanering er ikkje skadeleg.
Det er somme som kjenner skam på grunn av religiøs tru eller kultur. Då er det viktig å hugse at onanering verken er flaut eller forbode, men heilt normalt.
Dersom ein onanerer så mykje at det går ut over andre viktige ting i livet, kan onanering bli problematisk. Onanering bør ikkje gå ut over lekser, fritidsinteresser eller det å vere saman med andre.
Då kan det hjelpe å snakke med nokon. Ta kontakt med Helsestasjon for ungdom, fastlegen din, helsesjukepleiar på skulen eller ein annan vaksen du stoler på. Du kan også skrive til ung.no. Det er heilt anonymt.
1 / 2
Kvifor er det positivt å onanere?
Onanering er ein trygg måte å bli kjend med seg sjølv på og kva ein liker. I tillegg er onanering bra for helsa vår.
Når ein onanerer, aukar puls og blodtrykk. Dette styrkjer hjartet og krinsløpet.
Når ein får orgasme, blir også frigjort stoff som gjer at vi kjenner oss bra.
Nokre av stoffa gjer oss lykkelege. Andre stoff lindrar smerte og gjer oss avslappa og søvnige.
Vi kan også oppleve at hjartet slår raskare, og at vi får meir energi.
For gutar og menn kan jamleg utløysing minske risikoen for nokre typar kreft.
Sjølv om det er mange positive sider ved å onanere, er det viktig å hugse at ein skal gjere det berre om ein har lyst. Ingen skal tvinge nokon til å onanere.
Men om ein har lyst, har ein lov. Då er det fint å vite at onani er normalt og sunt.
1 / 3
Oppsummering
Onanering er sunt, det kan vere herleg og spennande, og det er ein fin måte å bli kjend med sin eigen kropp på. Det er også ein fin måte å gi andre nyting på, når ein er klar for det.
