Muisteliijat luothiin myyttii
Niin kauvoin ko ihmisillä oon ollu kieli, met olema muistelheet toinen toisele muisteluksii. Tätä tapattui ushein leirinuotiolla. Kokemuksii ja tiettoo jajethiin silloin. Aijan myöten met aloima fantaseeraamhaan ja luomhaan runnoi.
Muistelusten kautta meile selitethiin luonon assiita mitä met emmä ymmärtänheet ja met saima vastauksii suurhiin mysteerhiin. Ko muistelukset levithiin etheenkäsin, net kans muututhiin.
Ko muistelukset muistelthiin etheenkäsin, niistä tuli tottuutta kummalisemppii ja kammottaavamppii.
Het kekkä kuulthiin muistelukset ensimäistä kerttaa uskothiin ette se oli totta ja kojettu eletty elämys. Muisteluksesta oli tullu myytti.
Jos sie olet ollu myötä tieraamassa viskutteluleikkii, sie tieđät ette setninki tahi sana saattaa muuttuut paljon ko se oon kulkenu ensimäiseltä persoonalta viimiselle. Met muistelemma sen minkä met muistama, mutta met kuulema ushein pikkuisen väärin.
Ei se niin kummaa ole ette muistelus muuttuu ko sen muistelhaan monta kerttaa. Ko met muistelemma jotaki, met tykkäämä muistela liikkaa niin ette muistelus kuulostaa jännittäävämältä ko se oikkeesti oon.
1 / 5
Huleboere rundt leirbålet
Leirinuotiolta filmiksi
Kaikissa maissa oon omat mystiset muistelukset.
Kreikkalaisila oon muistelus minotaurista mikä oli puoliksi ihminen ja puoliksi purri.
Viikingit muistelthiin muisteluksii trolliin ja merikäärmheitten ympäri.
Merimiehet muistelthiin muisteluksii Krakenin ja muitten merimonsteriitten ympäri.
Myyttissii elläimii ja merimonsterii piđethään ushein filmiissä ja TV-seeriöissä. Sitä tehđhään ushein filmii vampyyriitten, ihmishukkiin, draakkiin, yksisarvisten ja kemppiin ympäri.
Ajattele vaikka Harry Potterii, Sormusten herraa ja Game of Thronesii.
1 / 2
Enhjørning
Kraken
Kraken muistutti hirmuissoo pläkkikallaa millä oli pitkät tentakkelit. Se saattoi murskata purjetlaivat ja nielaista koko miehistön kerrala. Kaikkiin merten merimiehet arkutethiin Krakenii.
Meri oli pölättäävä eikä kukhaan tieny sikkaristi mitä eli meren pinnan alla. Tođennäköisemmin merimiehet olthiin nähnheet ison pläkkikalan, ja se kasus isomaksi ja vaaralisemaksi joka kerta ko muisteluksen muistelthiin.
Kentaurit
Kentaurit oon olenot joila oon puoliksi ihmisen ja puoliksi hevoisen kroppi.
Myytti kentauriista oon saattanu synttyyt ko rattastaavat sotamiehet käythiin kanssoin pääle jokka ei koskhaan olheet aijemin nähnheet hevoissii.
Het oon häytynheet sekoittaat hevoisen ja rattastaajan nävyn monsteriksi.
Ihmishukat
Ihmishukan ympäri oon paljon erilaissii myyttii. Jokku muututhiin kokonhansa hukiksi ja toiset muututhiin hukan ja ihmisen sekoitukseksi.
Jokku muutethiin hukiksi rangaistuksena rikolisista tevoista ja toiset noiđuthiin hukiksi.
Ihmiset oon aina pölänheet hukkaa koska se oon petoelläin.
Sekä elläimii ette ihmissii jokka tapethiin muita ihmissii piđethiin ushein monsteriina. Se oli kans helpompi ajatella tappaajiita verenjanoisinna hukkina.
1 / 2
Vampyyrit
Vampyyrit olthiin ihmiset keitä lepakko oli purru.
Vampyyrit jahđathiin muita ihmissii ette juođa niitten vertä.
Myytti vampyyriistä oon ollu olemassa usheitten tuhanssiitten vuossiin aijan. Mutta usko vampyyrhiin alkoi lissäintymhään 1700-luvula.
Siihen aikhaan vampyyrit naulithiin kiini lyömälä rautaseiphään syđämen läpi. Näin net ei pystynheet nousemhaan hauđasta.
Oon olemassa tauti nimeltä porfyri. Het kekkä sairastaavat tätä tauttii ei kestä auringonnäkköö, heiđän muođoissa kassuu karvaa ja ikenet pörräänttyyvät niin ette nuskahamphaat näyttäävät suuremilta. Piian ihmissii keilä oli tämä tauti eppäilthiin vampyyriiksi?
1 / 2
Vampyr
Myyttiset monsterit kaikista kontinentista
CHUPACABRA | AMERIKKA
Chupacabra tarkoittaa keituri-immiijää spanskaksi. Se oon saanu nimen koska se juopi keituriitten vertä.
YKUR | EUROOPPA
Ykur oon harmaaja hevoinen Islanista.
Jos sie rattastat sillä, se freistaa hukuttaat sinun. Sen kaviot oon kääntynheet väärin päin. Näin se eroittuu tavalisesta hevoisesta.
ADZE | AFRIKKA
Tämä afrikkalainen vampyyri oon tulikärpänen ko se oon vaphaana, mutta se muuttuu ihmiseksi ko se oon fangitettuna.
Ko tämä oon kärpäsen haamussa, se saattaa ryömiit avvaimenreijän läpi ja immeet vertä nukkuuvista ihmisistä.
MANTICHORA | AASIA
Mantichora oon olento jolla oon ihmispää, jalopeuran kroppi ja skorpioonin häntä. Se nielaissee saalhiin kokonhaisena ja sillä oon kolme hammasrivvii.
BUNYIP | AUSTRALIA
Tämä monsteri hiiviskellee rämmeissä ja jovissa. Tästä monsterista oon usheita eri kuvvauksii. Se muistuttaa muun myötä hirmuisen issoo meritähtee.
Mutta entä kontinentti Antarktikka? Oonko sielä myyttissii monsteriita?
1 / 5
Chupacabra
Lähtheet:
- Årets begivenheter innen historie og vitenskap (2021)
Orage Forlag AS
Kuvat ja videot:
-
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
