Saamelaisten joiku

Saamelaisten joiku oon tärkkeetä kulttuuriperinttöö. Mutta mitä joiku oikhein oon?

Accessibility icon Saamelaisten joiku

Joiku – perintheinen saamelainen musikkihaamu

Saamelaisten joiku oon yksi Euroopan vanhiimista kansanmusikin haamuista. Joiku oon tärkkee osa saamekansan identiteettii. Ennen mailmassa joikethiin saamelaissii muisteluksii sukupolvesta toisheen. Joiku oon sillä sekä muistelemista ette musikkii.

Joiku oon vieläki tärkkee suulinen muisteliijantaiđet.

Joiku ja uskonto

Ennen noiđat joikethiin kannuksen kans uskonollisissa seremoniissa.

Nämät joijut olthiin ushein ko pitkät runot. Runoissa saattoi olla kokonhainen muistelus jonku elämästä. Joskus muistelus kulki kautta sukupolviin. Net saatethiin kans muistela ikivanhoi tarrui.

📷 Tässä met näjemä kannuksen missä oon eteläsaamelainen malli.

Joijun tunnusmerkit

Äänen erityinen pito oon yksi joijun tunnusmerkiistä. 

Joijussa oon lisäksi melodii, rytmi ja tahti. Joikumelodii kulkkee ymmyrässä ja sitä ei ole jajettu värshyin niin ko tavaliset laulut. Sen tähđen saattaa sannoot ette joiku ei koskhaan lopu.

Joiku pittää sisälttäät persoonan nimen josta joiku muistelee.

Persoonaa kuvvailhaan joikumelodiin kautta ja saattaa joikkaat eri dialektiila kans.

Forrige avsnitt

1 / 2

Neste avsnitt

Joiku jostaki

Oon tavalista sannoot joiku kuvvailee persoonaa, elläintä tahi maisemaa. Ette ihmisestä tahi jostaki joikethaan ei pruukata sannoot.

Persoonajoiku

Oon kunnia saađa oman joijun skenkiksi.

Jokku saađhaan joijun ristiäsissä tahi rippijuhlissa. Joijun rytmi ja melodii muistelhaan paljon persoonan personallisuuđesta ja ominaisuuksista.

Joiku kuvvailee ylheensä vain persoonan positiivissii trekkii.

Persoonajoijun saatethaan kans tehä jonku muistoksi tahi kunniaksi. Ko kuningas Olav aukaisi Sametingan vuona 1989 hän sai oman joijun. Kuningas Harald ja tronninki Sonja oon kans saanheet omat joijut.

Joikkui saatethaan pittäät friiastelhyyn kans. Silloin poika tahi tytär sannoo jotaki fiinii sinusta, piian hän halluu sinun käärestiksi.

Forrige avsnitt

1 / 3

Neste avsnitt

Elläinjoiku ja maisemajoiku

Elläimetki saattaava saađa oman joijun. Melodii kuvvailee elläimen trekkii, esimerkiksi kokkoo tahi sen liikumista.

Joikkuu saatethaan pittäät ette saađa elläimen olemhaan seppä tahi laukkomhaan noppeemin.

Luontojoiku saattaa kuvvaila vuođenaikkaa, palkista tahi esimerkiksi vaaraa.

Forrige avsnitt

1 / 2

Neste avsnitt

Joiku protestinna

Jokku joijut oon norjalaistamisen ympäri mikkä saamelaiset jouđuthiin kokemhaan yli sađan vuođen aijan. Silloin heiđät työnethiin pohjaisemmaksi ja pakoitethiin kääntymhään kristinuskhoon.

Joikkuu piđethiin yhtheenkuuluvaisuuđen tuntheen lujittamisheen ja protestinna kans. Vaikka virkamiehet ja lähđetyssaarnaajat osathiin vähäsen saamee, oli protestijoikhuin kerrottu sannoi ja ilmailsui mitä het ei osanheet.

Joiku oon kulttuuriperinttöö

Joikkamisen kielethiin silloin ko saamelaiset olthiin kristilistämisen alla. Joikkui piđethiin syntinä. Usheissa aloissa joiku katos kokonhansa.

Joiku oon vanhaata saamelaista kulttuuriperinttöö minkä oon tärkkeetä vieđä etheenpäin. Het kekkä ei saata oppiit joikkamhaan kotona, oppiiva sitä ushein koulussa tahi kursila.

Joikekurs med Berit Alette Mienna
Joikekurs med Berit Alette Mienna

Nykyaikhainen joiku

Nykyjään uusi interessi joikkamista kohthaan oon syntyny. Joiku inspireeraa sekä musikkigenrei ette eri ikäroikkii.

Joikkuu saattaa yhä usheemin kuulattaat raadiosta tahi nähđä TV:ssä, niin ko programissa “Stjernekamp” tahi NRK:n Spellemannprisen.

Forrige avsnitt

1 / 2

Neste avsnitt

Lähtheet:

  • Gaski, Harald; Ledang, Ola Kai; Aksdal, Bjørn: joik i Store norske leksikon på snl.no.
    Hentet 26. januar 2021 fra https://snl.no/joik

Kuva- ja video-oikkeuđet:

    1. Jørn Pettersen / Riksarkivet 
    2. Åge Hojem / NTNU Vitenskapsmuseet (CC BY 2.0)
    3. Getty Images / NRK Skole
    4. Getty Images / Per Steinar Lyngstad – YouTube
    5. Getty Images / Per Steinar Lyngstad – YouTube
    6. Ukjent
    7. Daniel Skog / Riddu Riđđu
    8. Tore Sætre (CC BY-SA 4.0) / NRK – YouTube