Usheimat miehet oon fyysisesti väkkeevämmät ja piian kans aggressiivisemmat ko vaimot. Siksi väkkeevä mies jolla oon pitkät käđet saattaa kanttaat painaaviita loovii vaimon puolesta.

Tutkimukset näyttäävät ette miehet valitteevat käärestiksi tahi vaimoksi naiset kekkä oon nuoremat ko het itte.

Tämän saatethaan selittäät evolusuuniteoriila eli biologiila. Miehet valitteevat nuoren ja hetelmällisen vaimon sen tähđen ko het halluuvat turvata ette het vievät suvun etheenkäsin ja saavat paljon lapsii.

Tutkimukset näyttäävät ette pojila ja tyttärillä oon erilaissii interessiitä. Net tykkäävät erilaisista färiistä ja ammatiista. Het käyttäävät kans ittensä eri laihiin.

Vanhiimet ja muut ihmiset heiđän ympärillä oon opettanheet tämän heile. Met ođotamma ette pojat tykkäävät poikavärkyistä ja poikafäriistä, ja ette tyttäret tykkäävät tytärvärkyistä ja tytärfäriistä.

Lastentarhaan työteliijät saattaavat anttaat lapsile tyypilissii poikavärkkyi ja tytärvärkkyi, tahi tyypilissii poikavaattheita ja tytärvaattheita.

Nämät assiit haamustaavat lasten identiteettii. Ko pojat tykkäävät roosasta ja tyttäret sinisestä, heitä piđethään erilaisina.

Se oon tärkkeetä muistaat ette met kaikin olema erilaiset, ja ette met häyđymä kunnioittaat sitä. Met saatama valita sen mistä tykkäämä ja kukka met halluuma olla henkkaamatta siitä, olemako pojat eli tyttäret.

Samfynnin sukupuolirolliile ja sukupuolieroile oon usheita selityksii. Oonko syyt bioloogissii tahi sosiaalissii? Olemako syntynheet erilaisina vai muutumako erilaisiksi?

Mitä sie meinaat?