Vil du starte di eiga bedrift?
Klar for å bli gründer? Så gøy! Viss du har lyst til å starte di eiga bedrift, er det eit par konkrete og praktiske ting du må gjere først.
Begynn med å registrere bedrifta di og velje ei passande selskapsform. Det betyr at du må finne ut om du vil starte eit aksjeselskap eller opprette eit enkeltpersonføretak, og at du må gi bedrifta di eit godt namn.
Nettside bør du òg få på plass, og kanskje du vil lage ein flott logo? Lat oss sjå nærare på kva som skal til.
Firmanamn
Først må du tenkje på kva firmaet ditt skal heite. Eit firmanamn kan gjerne spegle produktet eller tenesta du sel, slik at kundane skjønner kva bedrifta tilbyr. Finn gjerne eit namn som kan bidra til å gi firmaet merksemd.
Dette tenkte nok gründeren av Tak og Pris AS på, då han skulle starte for seg sjølv. Kan du tenkje deg kva dette firmaet jobbar med?
Eller kva med reinhaldsbedrifta Reinhjort AS? Litt tøysete namn, men det blir lagt merke til.
Det er lurt å finne på fleire namn, slik at du har nokre alternativ å velje mellom – gjerne eit trygt og stødig namn og eit anna som er litt morosamare. Kva vel du?
Pass på at namnet ikkje blir for useriøst, då kan det vere vanskeleg for folk å ta deg på alvor. Det du vil, er at folk skal leggje merke til bedrifta og hugse namnet, slik at dei vender seg til deg viss dei har bruk for produktet ditt.
Kjem du på nokre firmanamn du liker godt? Finn minst tre firmanamn du synest er bra og tre du ikkje liker. Snakk saman om kva som gjer at du liker/ikkje liker firmanamna.
Domene
I dagens digitale verd er det avgjerande å ha ein nettstad. Når du har funne eit namn du liker til bedrifta di, må du sjekke om domenet for namnet er ledig, altså at ingen andre brukar akkurat dette domenet. Eit domene er internett- og e-postadressa til eit firma, og dette er viktig å ha. Då kan kundane dine raskt kontakte deg og finne nyttig informasjon om firmaet ditt.
Det er veldig lett å finne ut av om eit domene er ledig. Berre søk på firmanamnet du vil ha på norid.no. Denne nettsida har oversikt over alle registrerte domene.
Lat oss seie at du skal selje hårprodukt og firmaet ditt skal heite Hei Sveis. Du har funne ut at heisveis.no er ledig, og vil ha domenet for denne nettadressa. Då kan du kjøpe domenet gjennom nettsider som tilbyr denne tenesta, og som registrerer namnet for deg.
På norid.no finn du ei oversikt over alle som tilbyr slike tenester. Når du har kjøpt domenet til firmanamnet ditt, kan du opprette ei nettside og e-postadresser til bedrifta di.
1 / 5
Nettside
Det viktig å lage ei nettside til bedrifta, slik at kundane dine enkelt kan kontakte deg og finne nyttig informasjon om kva du tilbyr.
Det finst fleire nettsider der du enkelt kan byggje di eiga nettside, til dømes Wix eller WordPress. Det er òg mogleg å få hjelp frå kunstig intelligens til å byggje nettsida, slik at du slepp å gjere heile jobben sjølv. Men du bør likevel ha klart for deg kva nettsida di skal innehalde.
Dette er nyttig å tenkje på når du skal lage heimeside:
- Kva tilbyr du? Det bør komme tydeleg fram.
- Kontaktinformasjon.
- Bilde og logoen din.
- Litt informasjon om deg og kva som er motivasjonen bak bedrifta.
- Mange legg òg ut kundeomtaler av produktet sitt på heimesida. Det kan vere betryggande for nye kunder.
- Det bør vere mogleg å bestille produktet eller tenesta di.
Tenk tekst
Hugs at nettsida di ofte er førsteinntrykket folk får av deg. Derfor er teksten på nettsida veldig viktig! Tenk på kva du vil fortelje, og korleis. Bruk gjerne fengjande film og bilde.
Kven er målgruppa di – altså dei du vil skal klikke seg inn på nettsida di? Det er desse menneska du må få til å ville kjøpe produktet eller tenesta di.
Lær mest mogleg om kven målgruppa di er, kva dei liker, og korleis du kan få dei til å velje firmaet ditt. Det du veit om målgruppa di, er det du skal ta utgangspunkt i når du legg ut tekst og bilde på nettsida di.
Sørg for at du kan bransjespråket for den bransjen du vil vere ein del av. Bruk bransjespråket aktivt på nettsida for å vise kunden at du er flink til det du driv med.
Gå saman to og to og vel dykk ein bransje. Det kan vere rørleggjar, reklamebransje, klede og mote eller spel og sport. Finn døme på ord og omgrep til bransjen de har valt.
- Kva var spesielt med språket for denne bransjen?
- Lærte de nokre nye ord og omgrep?
- Kva meiner vi når vi seier at det å bruke bransjespråk skaper tillit?
1 / 4
Logo
Me ser logoar overalt – på klede, bilar, mat, spel og telefonar. Alle bedrifter brukar logo for at folk skal kjenne igjen produktet deira. Ein logo bidreg til å byggje merkevara di anten du sel hundelufting eller t-skjorter.
Viss du lukkar auga og høyrer namna Snapchat, Apple, Nike eller Coca Cola, er sjansen veldig stor for at du ser for deg akkurat kva logo dei ulike selskapa har.
Når du veit kva du vil tilby, og du har funne eit firmanamn du liker, kan du begynne å lage ein logo. Då kan det vere lurt å få hjelp av nokon med erfaring som har peiling på grafisk design.
Logoen bør vise kva slags teneste du tilbyr. Viss bedrifta di til dømes skal tilby hundelufting, kan du gjerne vise dette med eit poteavtrykk i logoen. Tenk på ein logo som eit bilde eller eit ikon som forklarer kva du driv med.
Hugs på at logoen din ikkje må vere for lik ein logo som allereie er i bruk. Det er ikkje lov til å lage ein logo som er altfor lik nokon andre sin. Det kan vere skikkeleg vanskeleg å lage ein god logo, men det er veldig gøy når ein endeleg får det til!
1 / 3
Selskapsform og etablering
Når du skal starte din eiga bedrift, må du velje kva for organisasjonsform bedrifta di skal ha.
Det finst fleire typar, men dei to vanlegaste organisasjonsformene er aksjeselskap (AS) og enkeltpersonforetak. Vel den selskapsforma som passar best for deg, og registrer bedrifta di på brreg.no, Brønnøysundregistrene. Her får du vite steg for steg kva du må gjere for å komme i gang.
Lat oss sjå nærmare på dei to ulike selskapsformene, slik at du kan finne ut av kva som passar best for deg.
Mentorar og nettverk
Det vil vere til stor hjelp for deg som gründer å ha ein mentor. Ein mentor er ein støttespelar og rettleiar, ein som kan gi deg nyttige råd når du skal starte og drive bedrifta di.
Ein mentor kan vere ein i familien din, eller ein annan gründer som allereie har starta si eiga bedrift. Personen du vel, kan dele erfaringane sine med deg, og det er faktisk gull verd! Tenk så mykje ein annan gründer veit om arbeidslivet og kva det vil seie å drive si eiga bedrift!
Det finst òg fleire ulike mentorordningar du kan kontakte. Innovasjon Noreg har til dømes ei eiga mentorordning for gründerar. Men før du ber om hjelp, er det lurt å finne ut av kva du treng hjelp til. Vil du ha hjelp til å utvikle og teste produktet ditt? Eller lurer du på kvar du kan søkje om pengestøtte, eller korleis du set opp eit godt budsjett?
Uansett kva du vil ha hjelp til, er det lurt å begynne med å bruke nettverket ditt. Kjenne du nokon som har starta si eiga bedrift? Eller kanskje ein rekneskapsførar eller forretningsutviklar? Då er sjansen stor for at denne personen vil vere mentor for deg.
1 / 4
Finn ut meir
Gå inn på altinn.no og finn meir informasjon om enkeltpersonforetak og aksjeselskap.
Kva er fordelar og ulemper ved dei to ulike selskapsformene? Snakk saman om det de finn ut, og diskuter kva de ville valt sjølve.
