Vil du starte di eiga bedrift?
Så spennande!
Då må du finne eit godt namn til bedrifta, registrere bedrifta, og bestemme deg for om du vil starte eit aksjeselskap eller opprette eit enkeltpersonføretak.
Du bør òg lage ein flott logo og ei oversiktleg nettside.
Her kan du lese meir om korleis du gjer det.
Firmanamn
Først må du velje eit namn til firmaet ditt. Eit godt namn gjer at folk legg merke til firmaet ditt og forstår kva du tilbyr.
Kva trur du gründeren av Tak og Pris AS jobbar med?
Vel eit namn som passar, men pass på at det ikkje blir for useriøst. Det viktigaste er at folk legg merke til bedrifta og hugsar namnet.
Kjem du på nokon firmanamn du liker? Finn tre du liker og tre du ikkje liker. Snakk med dei andre om kvifor du liker eller ikkje liker desse namna.
Domene
I dag bør alle bedrifter ha ein nettstad. Vel eit namn for bedrifta og sjekk om domenet er ledig ved å gå inn på norid.no.
Viss du sel hårprodukt og vil kalle bedrifta di for “Hei sveis”, sjekkar du om heisveis.no er ledig.
På Norid.no kan du sjå kven som sel domene. Når du har kjøpt domenet, kan du lage ei heimeside og ei e-postadresse for bedrifta.
1 / 5
Nettside
Lag ei nettside for bedrifta, slik at folk kan finne deg.
Bruk gjerne nettstader som Wix eller WordPress til å lage sida. Du kan òg bruke kunstig intelligens til å gjere jobben enklare.
På heimesida di bør det stå:
- Kva du sel.
- Kontaktinformasjon.
- Bilde og logo.
- Informasjon om deg og kvifor du starta bedrifta.
- Kva kundane dine synest om bedrifta.
- Det bør òg vere mogleg å bestille produkt eller tenester.
Tenk tekst
Nettsida di er ofte det første folk ser. Derfor er det viktig å tenkje på kva du vil fortelje, og korleis.
Kven er det du vil skal klikke seg inn på nettsida di? Dette er målgruppa di.
Lær om kva målgruppa di liker og korleis du kan få dei til å velje firmaet ditt. Bruk fagspråk på nettsida for å vise folk at du veit kva du driv med.
Gå saman to og to og vel ein bransje. Finn ord som er spesielle for bransjen de har valt.
- Lærte du nokre nye ord og omgrep?
- Kva trur du det betyr at bransjespråk skaper tillit?
1 / 4
Logo
Alle bedrifter brukar logo for at folk skal kjenne igjen produktet deira.
Når du tenkjer på merke som Snapchat, Apple, Nike eller Coca Cola, klarer du sikkert å sjå for deg logoane deira.
Pass på at logoen din ikkje liknar for mykje på andre logoar. Det er ikkje lov å herme etter andre.
Det kan det vere lurt å få hjelp av nokon med erfaring til å lage ein logo. Å lage ein logo er hardt arbeid, men det er skikkeleg gøy når arbeidet er ferdig!
1 / 3
Selskapsform og etablering
Når du startar ei bedrift, må du velje om du vil starte aksjeselskap (AS) eller enkeltpersonforetak. Så må du registrere bedrifta på brreg.no, Brønnøysundregistrene.
Lat oss sjå nærmare på dei to selskapsformene.
Mentorar og nettverk
Det er lurt å ha ein mentor når du skal starte eiga bedrift. Ein mentor gir råd og hjelper deg i gang.
Du kan godt bruke nokon du kjenner som har eiga bedrift. Dei vil sikkert hjelpe deg. Du kan òg kontakte ei mentorordning, til dømes Innovasjon Noreg.
1 / 4
Finn ut meir
Besøk nettsida altinn.no og les om enkeltpersonforetak og aksjeselskap.
Kva er positivt og negativt med kvar type bedrift? Diskuter kva for type de ville valt, og kvifor.
