Vel din eigen veg
Når du er 16 år, må du velje kva slags linje du vil gå på vidaregåande skule.
Dette er eit viktig val som påverkar kva du skal gjere dei neste tre-fire åra og kanskje kva slags jobb du får seinare.
Her er nokre tips:
- Draumane dine: Kva liker du? Kva vil du bli?
- Styrkane dine: Kva for fag er du god i? Kva liker du å gjere på fritida?
- Finn informasjon: Lær om dei ulike programma og jobbane dei kan føre til.
Bruk tid på å bestemme deg. Snakk med rådgivar på skulen, foreldre og andre som kjenner deg godt. Dei kan hjelpe deg.
Det viktigaste er at du blir fornøgd med valet ditt. Det skal kjennest riktig for deg!
1 / 2
Finn ut kva du liker
Tenk på kva du er flink til og kva du liker å gjere. Dette kan hjelpe deg å velje rett utdanning og yrke.
- Liker du skulearbeid eller å jobbe med hendene?
- Liker du å jobbe saman med andre eller åleine?
- Er du utadvendt og pratar med alle, eller er du sjenert og stille?
- Til nokre jobbar må ein vere sterk, og til nokre jobbar må ein vere flink med hendene.
Høyr på råd: Det er lurt å lytte til andre, men du må sjølv velje det du liker.
Tenk på framtida: Kva slags jobbar blir viktige i framtida? Kva slags jobbar vil forsvinne?
Kan du ombestemme deg?
Ja! Viss du ombestemmer deg, kan du byte program. Du kan òg ta ekstra fag seinare, slik at du får studiekompetanse.
Hugs at ingen utdanning er bortkasta tid.
1 / 2
Utdanningsprogram
Når du skal søkje vidaregåande skule, kan du velje blant 15 ulike utdanningsprogram.
Du kan velje eitt av fem studieførebuande program der du førebur deg på å studere vidare på høgskule eller universitet.
Eller du kan velje eitt av ti yrkesfaglege program der du lærer eit bestemt yrke.
Studieførebuande program:
- Idrettsfag – for deg som liker sport.
- Kunst, design og arkitektur – for deg som liker å teikne og lage ting.
- Medium og kommunikasjon – for deg som liker sosiale medium, film eller å skrive.
- Musikk, dans og drama – for deg som liker musikk og å opptre.
- Studiespesialisering – gir deg kunnskap for å studere vidare på universitetet.
Nå skal vi sjå nærmare på desse fem programma.
Idrettsfag
På Idrettsfag lærer du om:
- trening og helse
- korleis leie treningar
- kosthald og kroppsfunksjonar
- nokre teoretiske fag
Passar for deg som:
- liker sport
- vil trene mykje
- er flink i sport
Moglegheiter etterpå:
- studere vidare
- bli fysioterapeut, idrettspsykolog eller personleg trenar
- jobbe på skule, på treningssenter, i idrettsorganisasjonar eller med rehabilitering
Kunst, design og arkitektur
Du lærer å:
- teikne og lage ting med ulike materialar
- forstå kunst og kultur
Passar for deg som:
- er kreativ
- liker å lage ting
Jobbmoglegheiter:
- arkitekt, designar eller kunstnar
- jobb i designbyrå, museum, galleri
Medium og kommunikasjon
Du lærer å:
- fortelje historier med tekst, bilde og lyd
- bruke digitale verktøy
Passar for deg som:
- er kreativ
- vil skrive eller lage anna innhald for papir eller nett
- vil jobbe med sosiale medium og nettside
Jobbmoglegheiter:
- Aviser, TV, digitale medium
- Du kan bli journalist, designar eller jobbe med markedsføring
Musikk, dans og drama
Du kan velje mellom:
- musikk
- dans
- drama
Passar for deg som:
- liker å opptre
- ønskjer å bli god på instrumentet ditt, dans eller drama
Jobbmoglegheiter:
- Musikar, dansar eller skodespelar
- Jobb i orkester, teater, opera eller som lærer
Studiespesialisering
På Studiespesialisering lærer du om:
- realfag
- språk
- samfunnsfag
- økonomi
Passar for deg som:
- er god på skulearbeid
- vil studere vidare på universitet eller høgskule
Jobbmoglegheiter:
- ingeniør, lege, psykolog, lærer, advokat og mykje meir
- uendelege jobbmoglegheiter
Yrkesfaglege utdanningsprogram
Dei yrkesfaglege programma lærer deg ferdigheiter direkte knytta til ulike jobbar:
- Bygg- og anleggsteknikk – lær å byggje eller reparere bygningar og andre strukturar
- Elektro og datateknologi – for teknologiinteresserte som vil jobbe med elektronikk eller datamaskinar
- Frisør, blomster, interiør og eksponeringsdesign – for kreative som vil jobbe med estetikk eller design
- Handverk, design og produktutvikling – kombinerer handverk med moderne design
- Helse- og oppvekstfag – for dei som vil jobbe i helsevesenet eller med barn og unge
- Informasjonsteknologi og medieproduksjon – for framtidige ekspertar i IT og media
- Naturbruk – for deg som er interessert i landbruk, fiske eller skogbruk
- Restaurant- og matfag – lær å lage mat eller drive restaurant
- Sal, service og reiseliv – for ei framtid i sal eller turistindustrien
- Teknologi- og industrifag – for dei som er interesserte i industriell produksjon og teknologi
Etter det første året spesialiserer du deg innan ei bestemt retning. Det tredje og fjerde året kan du velje å vere lærling i ei bedrift i staden for å gå på skulen. Du kan òg ta påbygg til slutt, slik at du får studiekompetanse.
Nå skal vi utforske desse programma nærmare.
1 / 3
Bygg- og anleggsteknikk
Du lærer å:
- byggje og vedlikehalde store og små bygningar
- arbeide med ulike materialar og byggjeteknikkar
- jobbe sjølvstendig og som del av eit team
Passar for deg som:
- liker praktisk arbeid og er flink med hendene
- kan jobbe godt både åleine og i team
Jobbmoglegheiter:
- veg- og anleggsarbeider eller asfaltør
- anleggsgartnar eller maskinførar for anleggsmaskinar
- målar, murar, tømrar eller røyrleggjar
- snikkar, glasarbeidar, stillasbyggjar, taktekkar eller blikkenslagar
Arbeidsstader:
- offentlege og private bygg- og anleggsbedrifter
- små handverksfirma og store entreprenørfirma
1 / 2
Elektro- og datateknologi
På Elektro- og datateknologi lærer du å installere, vedlikehalde og reparere elektriske og elektroniske system. Dette inkluderer montering, kobling og programmering av ulike typar system og anlegg. Du lærer òg om utvikling av nye elektroniske produkt, og korleis du kan konfigurere og programmere utstyr og komponentar. Sikkerheit og nøyaktigheit i dokumentasjon av arbeidet ditt vil òg bli vektlagt.
For å trivast i dette feltet bør du vere:
- nøyaktig og systematisk i arbeidet ditt
- praktisk anlagt
- serviceinnstilt og ha ei logisk tilnærming til problemløysing
- kreativ og ha godt fargesyn, då dette ofte er nødvendig i arbeid med elektriske komponentar
Etter utdanninga har du mange karrieremoglegheiter, mellom anna som:
- elektrikar eller elektroreparatør
- energioperatør eller energimontør
- tavlemontør, signalmontør eller heismontør
- avionikar eller flymekanikar
- romteknolog, data- eller produksjonselektronikar
- automatikar eller FU-operatør
- kulde- og varmepumpemontør
Du kan arbeide i både offentlege og private bedrifter, og finne jobbar innanfor prosess- eller elektronikkindustrien, mekanisk industri, energiverk, jernbanedrift, samt data-, fly- og oljebransjen.
1 / 2
Teknologi- og industrifag
Du lærer å:
- planleggje og gjennomføre ein effektiv produksjon
- programmere og handtere robotar
- bruke ulike maskinar og produksjonsutstyr
- forstå kjøretøy og transportteknikk
- arbeide med kjemiske prosessar og kjemiteknikk
- følgje standardar for helse, miljø og sikkerheit
Passar for deg som:
- er praktisk anlagt og liker å jobbe med hendene
- er nøyaktig og sjølvstendig
- har interesse for ny teknologi og liker å reparere ting
Jobbmoglegheiter:
- aluminiumskonstruktør, sveisar, platearbeidar eller finmekanikar
- faglaborant i kjemisk industri, bilskadereparatør, bilmekanikar eller billakkerer
- logistikkoperatør, yrkessjåfør, anleggsmaskinmekanikar, landbruksmaskinmekanikar eller motormekanikar
- boreoperatør, brønnoperatør, matros eller motormann
Arbeidsstader:
Du kan få jobb i teknisk og elektromekanisk industri, på båt, bilverkstad/fabrikk, kjemisk prosessindustri og i transportsektoren.
1 / 2
Helse- og oppvekstfag
Du lærer å:
- fremje sunn livsstil og førebygge sykdom
- forstå fysisk og psykisk helse
- forstå korleis kroppen er bygd opp og fungerer
- ta vare på folk og gi god omsorg
- forstå korleis barn og unge utviklar seg
- vektlegge sunn mat og god hygiene
Passar for deg som:
- er omsorgsfull og bryr deg om andre
- er god til å snakke med folk og samarbeide
- har interesse for helse og velferd
Jobbmoglegheiter:
- helsefagarbeidar, ambulansearbeidar eller portør
- aktivitør eller barne- og ungdomsarbeidar
- apotekteknikar, helsesekretær eller tannhelsesekretær
- hudpleiar, fotterapeut eller ortopediteknikar
Du kan få jobb på:
- sjukehus, sjukeheim og heimeteneste
- barnehagar og skulefritidsordningar
- apotek, tannlege- og legekontor
- fot- og hudpleiesalongar
Dette studiet førebur deg på ein karriere der du kan gjere ein forskjell i helse og livskvalitet for mange menneske.
1 / 2
Restaurant- og matfag
Her lærer du om:
- kosthald, ernæring og kvar viktig næringsstoff er for helsa
- å lage og servere mat på ein profesjonell måte
- korleis du tek vare på kvaliteten på råvarer
- ulike mattradisjonar og korleis mat påverkar ein sunn livsstil
Passar for deg som:
- er praktisk anlagt og liker å jobbe med hendene
- er kreativ og nøyaktig
- trivst med å arbeide i eit team og yte service
Jobbmoglegheiter:
- kokk eller servitør
- bakar eller konditor
- pølsemakar, kjøtskjerar, slaktar eller ferskvarehandlar
- sjømatproduksjon eller industriell matproduksjon
Arbeidsstader:
- restaurantar og hotell
- sjukehus og andre helseinstitusjonar
- næringsmiddelindustrien, bakeri, konditori og slakteri
- butikkar med eigne ferskvarediskar
1 / 2
Sal, service og reiseliv
Du lærer å:
- drive og marknadsføre ei forretning
- handtere kundeservice og sal
- planlegge og utføre sikkerheitstiltak i verksemda
- forstå reiseliv og turisme
Passar for deg som:
- er organisert og målretta
- er kreativ og strategisk
- er flink til å snakke med folk
Jobbmoglegheiter:
- salsmedarbeidar eller i reiseliv
- sikkerheit i ulike bedrifter
Arbeidsstader:
- eiga bedrift
- kontor, hotell, turisme- og reiselivsbedrifter
- butikkar, større bedrifter, vaktselskap, alarmsentralar eller flyplassar
1 / 2
Informasjonsteknologi og medieproduksjon
Du lærer:
- å utvikle idear og finne kreative løysingar
- tekniske ferdigheiter som IT-støtte, nettverk, IT-sikkerheit og programmering
- å gi informasjon gjennom foto, film og grafisk design
- forstå og bruke kommunikasjon og marknadsføringsteknikkar
Passar for deg som:
- er kreativ og interessert i teknologi
- liker å jobbe med visuelle medium og uttrykksformer
- er nøyaktig og liker å jobbe med detaljar
Jobbmoglegheiter:
- IT-utviklar eller IT-driftsteknikar, der du handterer alt frå nettverk til programvareutvikling
- mediebransjen som mediedesignar, medieteknikar eller medieprodusent, der du skaper digitalt innhald
- IT-driftsselskap, IT-avdelingar i større bedrifter, multimediebedrifter, reklamebyrå og forlag
1 / 2
Handverk, design og produktutvikling
Du lærer å:
- bruke både tradisjonelle og moderne handverksteknikkar
- arbeide med ulike materialar og skape miljøvennlege produkt
- forstå handverket si historie og handverket si rolle i kulturen
Passar for deg som:
- liker å arbeide med hendene
- vil skape og designe eigne produkt
- jobbar nøyaktig og er tolmodig
Jobbmoglegheiter:
- urmakar, gullsmed eller sølvsmed
- sy klede, kostyme eller bunader
- møbelsnikkar, treskjerar, orgelbyggar, keramikar, skomakar eller smed
- design- og handverksbedrifter, teater, operahus
1 / 2
Frisør, blomster, interiør og eksponeringsdesign
På Frisør, blomster, interiør og eksponeringsdesign utviklar du dei kreative evnene dine og lærer alt frå hårstyling og blomstraroppsatsar til interiør og vindaugsutstillingar. I tillegg lærer du om stilhistorie og korleis vi får nye trendar.
Andre fag som kommunikasjon og kundebehandling er òg viktig på dette programmet.
Dei som trivst her, er kreative og har sans for estetikk. Dei liker å jobbe med hendene og er opptekne av korleis ting ser ut.
På dette programmet kan du til dømes utdanne deg til:
- blomsterdekoratør
- frisør
- interiørkonsulent
- utstillings- eller eksponeringsdesignar
- maskør- og parykkmakar
Du kan få jobb i møbelbutikk, interiørbutikk, blomsterbutikk, frisørsalongar, teater eller reklame- og designbyrå.
1 / 2
Naturbruk
Du lærer å:
- ta vare på jorda sine naturressursar
- arbeide med dyr, plantar og biologisk produksjon
Passar for deg som:
- er interessert i naturen og ønskjer å vere ute
- ønskjer eit praktisk arbeid og vil vere fysisk aktiv
- er oppteken av miljø og dyrevelferd
Jobbmoglegheiter:
- landbruk, skogbruk, gartneri
- dyrepleie, fiskeoppdrett, reindrift
- gartnar, skogsoperatør eller agronom
1 / 2
Oppsummert
Når du skal velje vgs, må du altså velje mellom studieførebuande og yrkesfagleg opplæring.
Studieførebuande opplæring:
- Du finn fem ulike program.
- Du går på skulen i tre år: Vg1, Vg2 og Vg3.
- Etter tre år får du generell studiekompetanse og kan søkje på høgskule eller universitet.
Yrkesfagleg opplæring:
- Du kan velje mellom ti program.
- Utdanninga varer frå tre til fem år.
- Du får eit yrke med fagbrev etter to år på skule og to år i lære i ei bedrift.
- Viss du tar all opplæring på skulen, får du yrkeskompetanse utan fagbrev.
- Deretter kan du søkje jobb eller studere vidare på fagskule.
- Du kan òg ta eit ekstra år for å få generell studiekompetanse for å ta høgare utdanning.
Grunnkompetanse
Viss du ikkje fullfører heile utdanninga fordi du sluttar eller stryk i nokre fag, kan du få eit kompetansebevis som viser kva du har lært.
No er det din tur til å utforske kva slags utdanningsprogram som passar for deg.
Lykke til!
1 / 3
