Meiđän kaunis mailma – Eurooppa
Meiđän mailmassa oon paljon jännittääviitä paikkoi mikkä luonto oon haamustannu. Met ihmiset olema kans luonheet kaunhiita paikkoi.
Tässä artikkelissa sie opastut seittemheen erikoisheen paikkhaan Euroopassa.
1. Neuschwansteinin linna | Tyskä
Neuschwansteinin linna Tyskässä oon torniin, kierttääviitten trappuin ja klasimaalausten labyrintti. Linna antoi inspirasuunii Walt Disneyn eeventyyrilinnale. Jos sie käyt tässä linnassa, sie saatat tutkiit sen kaunhiita lommii ja saalii, justhiin niin ko olisit itte Tuhkapotti.
Bayernin kuningas Ludvig II kehäytti Neuschwansteinin linnan hiljain 1800-luvula. Kuningas oli unisteliija ja eventyyräri, ja hän halus rakenttaat ritarilinnan.
Linna oon jyrkälä harjula Alppiin juurela, ja sieltä oon idylinen näkymä järven yli. Se oon helppo tajuta miksi kuningas valitti tämän paikan ittensä unistuslinnale.
Valitettavasti kuningas ei koskhaan saanu nähđä linnaa valmhiina. Hänen panthiin pois kuninkhaan virasta ja hiljemin hänen löyđethiin mystisellä tavala hukkunheena järvestä.
Neuschwanstein ovet aukaisthiin publikumile ko haluthiin hankkiit rahhaa ette linnan saatais pykätä valmhiiksi.
1 / 3
Neuschwanstein slott i Tyskland
2. Giant’s Causeway | Pohjais-Irlanti
Pohjais-Irlanin suuriin attraksuuni oon paikka missä oon täyđeliset, kuuđenkanttiset laavatolpat. Täältä oon uskomattoman näkymä Skotlanthiin.
Legendan jälkhiin kemppi Finn mac Cumaill rakensi Causewayn.
Hän viskas kivvii vetheen ko aikoi pykätä sillan niin ette skotlantilainen kemppi, Bennandonner, saattais tulla tappelemhaan hänen kans duellissa.
Tođelisuuđessa kivet oon 60 miljuunaa vuotta vanhaata laavaa jopa oon koventunnu yli 40 000 tolpaksi.
Se oon helppo ymmärttäät miksi Giant’s Causeway oon UNESCO:n mailmanperintölistala. Tämä oon Pohjais-Irlanin ainua attraksuuni mikä oon listala. Paikala oon korkkee arvo sekä tietheen ja taitheen mailmassa.
1 / 3
Giant's Causeway i Nord-Irland
3. Alhambra | Spania
Alhambra oon suuri fästinki Granadan kaupungissa. Täältä löyttyy fantastissii tarhaita, kaarikangii ja loistaaviita sinissii truiskukalttiita sekä kolme ihanaa linnaa.
Tämä oon yksi Euroopan kaunhiimista islamilaisen taitheen ja arkitektuurin esimerkiistä.
Alhambra oli ensisti roomalainen fästinki. 1100-luvula arabialainen hallittiija rakensi sen uuđesti ette sieltä saattoi nähđä kaupungin yli.
Spanian tehthiin kristiliseksi taas vuona 1492. Sen jälkhiin katooliset kuninkhaat ja tronningit pykäthiin omat linnat sinne.
Het pykäthiin net ko haluthiin panna kalvheesseen sen mitä Spanian entiset muslimihallittiijat olthiin pykänheet.
1 / 3
4. Bled-järvi | Slovenia
Bled-järvi oon kuvvaajan unistus. Järvi oon alpiila Slovenian pohjaisvestassa, likelä Bledin kyllää.
Vaarat ja mettät ympäröitteevät tämän idylisen paikan. Bledin linna sijaittee korkkeela järven pohjaisrannala.
Kaiken tämän kaunheuđen keskikohta oon saari mikä oon järven keskelä. Saaressa oon kirkko joka oon pyhitetty Neittyt Marialle.
Kirkon pykäthiin 1600-luvula. Siinä oon 52 meetterii korkkee torni ja 99 trappuu jokka nousthaan veđen rajasta.
Jos sie käyt mukala Bledin linnassa, saatat nauttiit fantastisesta näkymästä järvele, saarile ja ympäröitteeville vaaranlajile.
Linna oon 1100-luvulta ja sen arkitektuuri oon huomattava. Täälä saatat käyđä keskiaikhaisessa museumissa missä oon maalauksii ja mööpeliitä. Sie saatat kans opetella kirjoin pränttäämistä linnan omassa präntissä.
1 / 3
Bledsjøen i Slovenia
5. Meteora | Kreikka
Kreikka oon tunnettu sen klosteriista, kirkoista ja muista uskonollisista paikoista. Net oon ushein rakenettu syrjäisille vaaranlajile ja kivisille sulluile.
Yksi näistä oon Meteoran klosterit. Täälä klosterit tarraavat kiini pahđan reunhaan.
Munkit, nunnat ja eremittit oon asunheet tässä syrjäisessä osassa Kreikkaa kristinuskon ensi päivistä saakka.
Tyrkin hyökkäyksen uhka pakoitti heiđät siirtymhään ylös vaaroile. Het pykäthiin huonheet kivitoppiin pääle tahi korkkeile pahđoile. Se piti käyttäät tikapuita ette pääsi ylös klosterhiin.
Tääpänä jäljelä oon vain kuusi klosterii Meteorassa. Niissä saattaa käyđä, vaikka sielä assuuki muutama munkki ja nunna.
Täälä saatat kattela vanhoi freskoi eli seinämaalauksii, kaunhiita kapelliita ja hyvin hoiđettui haakkii.
1 / 3
Meteora i Hellas
6. Plitviče-järvet | Kroatia
Plitviče-järvet Kroatiassa oon 16 järvee jokka kurkkiit sittoovat yhtheen. Sie saatat kävelä puusilloila jokka kulkkeevat pitkin ja poikin järviin yli. Täälä sinun ympäröittee smaragdinvihrinen vesi joka oon haamustannu maisemaa usheitten tuhanssiitten vuossiin aijan.
Järvet oon osa pitkää jokkee mikä virttaa kahđen vaaran välissä. Veđen kalkki anttaa järvile niitten erityisen, vaaleevihrisen färin.
Kalkki painuu pohjhaan ja luopi jatkuuvasti uussii pattoi jokhiin. Siitä synttyy pienii järvii. Pađot ja järvet muuttuuvat aijan myötä ko vesi virttaa alas ja jättää kalkkii uushiin paikkhoin.
Plitviče-järvet päästhiin UNESCO:n mailmanperintölistale vuona 1979, ja se oon vieläki Kroatian populääriin turistikohđet.
1 / 3
Plitvice i Kroatia
7. Stonehenge | Iso-Britannia
Stonehenge oon maamerkki Iso-Britanniassa jonka oon helppo tunnistaat. Kukhaan ei ole aivan sikkari siitä kuinka kivet tulthiin sinne.
Kivet oon olheet sielä vähhiinthään 3500 vuotta. Tuhanet turistit käyvät Stonehengessa joka vuosi.
Kalttiit:
- 101 steder du må oppleve (før du dør) (2020)
Orage Forlag AS
Kuvat ja videot:
-
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
