Meiđän kaunis mailma – Eurooppa
Meiđän mailmassa oon paljon jännittääviitä paikkoi.
Tässä artikkelissa sie saat opastuut 7 erityisen paikan kans Euroopassa.
1. Neuschwansteinin linna | Tyskä
Neuschwansteinin linna oon torniin, kiertämätrappuin ja klasimaalausten labyrintti. Linna oli inspirasuuninna Walt Disneyn eventyyrilinnale. Täälä sie saatat tutkiit kaunhiita lommii ja saalii, justhiin ko sie olisit Tuhkapotti itte.
Bayernin kuningas Ludvig II rakensi Neuschwansteinin linnan hiljain 1800-luvula. Hän oli eventyyräri joka halus rakenttaat eventyyrilinnan.
Linnala oon fantastinen näkymä kaunhiile järvele ja Alpiile. Se oon tođelinen unistuslinna.
Valitettavasti kuningas ei koskhaan nähny linnaa valmhiina. Hänen poistethiin kuninkhaan virasta ja hiljemin hänen löyđethiin järvestä. Hän oli hukkunu mystisesti.
Neuschwansteinin ovet aukaisthiin publikumile ette hankkiit rahhaa linnan lopphuun pykkäämisheen.
1 / 3
Neuschwanstein slott i Tyskland
2. Giant’s Causeway | Pohjais-Irlanti
Giant’s Causeway oon ala missä oon kuuđenkanttiset laavapylvhäät. Sieltä oon uskomaton näkymä Skotlanthiin.
Legendan jälkhiin kemppi Finn mac Cumill pykkäs Causewayn.
Hän viskas kivvii vetheen ette rakenttaat sillan niin ette Skotlanin kemppi, Bennandonner, saattoi tulla tappelemhaan hänen kans.
Tođelisuuđessa kivet oon koventunnutta laavaa.
Giant’s Causeway oon UNESCO:n mailmanperintölistala. Paikkaa piđethään tärkkeenä sekä tietheen ette taitheen mailmassa.
1 / 3
Giant's Causeway i Nord-Irland
3. Alhambra | Spania
Alhambra oon suuri fästinki. Fästingissä oon fantastissii tarhaita, kaarikangii ja kolme ihanaa linnaa.
Se oon yksi Euroopan islamilaisen taitheen ja arkitektuurin helmistä.
Alhambra oli ensisti roomalainen fästinki.
1100-luvula arabialainen hallittiija rakensi sen uuđesti.
Spania kääntyi jälleen kristinuskhoon vuona 1492. Katooliset kuninkhaat ja tronningit rakenethiin omat linnat.
Het haluthiin rakenttaat jotaki mikä oli kokonhansa erilainen ko se mitä musliimit olthiin rakentanheet.
1 / 3
4. Bled-järvi | Slovenia
Bled-järvi oon kuvanottaajan unistama. Se oon likelä kyllää Bled, Slovenian Alpiila.
Vaarat ja mettät ympäröitteevät järven. Korkkeela järvestä pohjaisheen käsin näjet Bledin linnan.
Kaiken tämän kaunheuđen keskikohta oon saari mikä oon järven keskelä. Saarela oon kirkko minkä oon rakenettu Neittyt Marialle.
Kirkossa oon 52 meetterii korkkee torni ja 99 porrasaskeletta mikkä nousseevat veđen viereltä.
Jos sie lähđet Bledin linnhaan, sie saat fantastisen näkymän järven yli.
Linna oon 1100-luvulta. Täälä sie saatat nähđä mööpeliitä ja maalauksii museumissa ja opetella kirjoin pränttäämistä linnan omissa präntissä.
1 / 3
Bledsjøen i Slovenia
5. Meteora | Kreikka
Kreikka tunnethaan sen klosteriista ja kirkoista. Net oon ushein rakenettu vaaranlajile ja pienile holmiile meressä.
Yksi näistä oon Meteoran klosterit. Sielä klosterit oon takertunheina kallionseinhään.
Munkit, nunnat ja eremiitit oon kristinuskon alusta asti asunheet täälä.
Ko Tyrkin hyökkäs heiđän pääle, het häyđythiin pykätä ylös vaaroile. Het pykäthiin huonheita kiviseiphäile tahi korkkeile kallioile mihin piti käyttäät tikkapuita ette päästä ylös.
Nykyjään klosterii oon tyhä kuusi jäljelä Meteorassa. Niissä sie saatat käyđä vaikka sielä vielä assuu muutama munkki ja nunna.
Täälä sie saatat kattoot vanhoi freskoi eli seinämaalauksii, kaunhiita kapelliita ja hyvin hoiđettui tarhaita.
1 / 3
Meteora i Hellas
6. Plitviče-järvet | Kroatia
Plitviče-järvet Kroatiassa oon 16 järvee ja niitä yhđistäävät vesiputtoukset. Puusillat kulkkeevat järviin yli. Täälä saatat kaalaat smaragdinvihrisessä veđessä joka kantila.
Järvet oon osa pitkää järvee mikä virttaa kahđen vaaran välissä. Veđessä oon kalkkii mikä anttaa järvile vaaleevihrisen färin.
Kalkki painuu pohjale ja luopi pattoi ja pienii järvii.
Plitviče-järvet oom UNESCO:n mailmanperintölistala, ja se oon Kroatian populääriin turistinähtävyys.
1 / 3
Plitvice i Kroatia
7. Stonehenge | Iso-Britannia
Se oon helppo tunnistaat Stonehengen Iso-Britanniassa. Kukhaan ei tieđä varmasti kunka kivet oon joutunheet sinne.
Kivet oon seisonheet paikalansa vähhiinthään 3500 vuotta. Tuhanet turistit käyvät Stonehengella joka vuosi.
Lähtheet:
- 101 steder du må oppleve (før du dør) (2020)
Orage Forlag AS
Kuvat ja videot:
-
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
