Meiđän kaunis mailma – Eurooppa
Meiđän mailmassa oon paljon jännittääviitä paikkoi mikkä luonto oon formanu. Met ihmiset olema kans luonheet paljon kaunhiita paikkoi.
Tässä artikkelissa sie saat opastuut 7 erityisheen paikkhaan Euroopassa.
1. Neuschwansteinin linna | Tyskä
Neuschwansteinin linna Tyskässä oon torniin, kiertämätrappuin ja klasimaalausten labyrintti. Linna oli inspirasuuninna Walt Disneyn eventyyrilinnale. Jos sie käyt tässä linnassa, sie saatat tutkiit sen kaunhiita lommii ja saalii, justhiin ko olisit Tuhkapotti itte.
Bayernin kuningas Ludvig II kehäytti Neuschwansteinin linnan hiljain 1800-luvula. Kuningas oli unistelliija ja eventyyräri, ja hän halus rakenttaat ritarilinnan.
Linna oon jyrkälä harjula Alppiin juurela ja sieltä saapi idylisen näkymän järven yli. Oon helppo ymmärttäät miksi hän valitti tämän paikan ittensä unistuslinnale.
Valitettavasti kuningas ei koskhaan saanu nähđä linnaa täysin valmhiina. Hänen poistethiin kuninkhaan virasta ja hiljemin hänen löyđethiin mystisesti hukkunheena järvestä.
Neuschwanstein ovet aukaisthiin publikumile nette linnan valmhiiksi rakentamisheen saatais rahhaa.
1 / 3
Neuschwanstein slott i Tyskland
2. Giant’s Causeway | Pohjais-Irlanti
Pohjais-Irlanin suuriin attraksuuni oon paikka missä oon täyđelisen haamuissii kuuđenkanttissii laavapylvhäitä. Täältä saapi uskomattoman näkymän Skotlanthiin.
Legendan jälkhiin kemppi Finn mac Cumaill rakensi Causewayn.
Hän viskatteli kivvii vetheen ette rakenttaat sillan niin ette Skotlanin kemppi, Bennandonner, pääsis tappelemhaan duellissa hänen kans.
Tođelisuuđessa kivet oon 60 miljuunaa vuotta vanhaa laavaa mikä oon koventunnu yli 40 000 seiphääksi.
Se oon helppo ymmärttäät miksi Giant’s Causeway oon UNESCO:n mailmanperintölistala. Se oon Pohjais-Irlanin ainua attraksuuni mikä oon listala. Paikkaa piđethään suuressa arvossa sekä tietheen ette taitheen mailmassa.
1 / 3
Giant's Causeway i Nord-Irland
3. Alhambra | Spania
Alhambra oon suuri fästinki Granadan kaupungissa. Fästningissä oon fantastissii tarhaita, kaarikangii ja loistaaviita sinissii truiskulähtheitä sekä kolme ihanaa linnaa.
Tämä oon yksi Euroopan kaunhiimista islamilaisen taitheen ja arkitektuurin esimerkiistä.
Alhambra oli ensisti roomalainen fästinki. 1100-luvula arabialainen hallittiija rakensi sen uuđesti nette sieltä saathiin näkymän kaupunkhiin.
Spania kääntyi jälleen kristinuskhoon vuona 1492. Sen jälkhiin katooliset kuninkhaat ja tronningit rakenethiin omat linnat Alhambrhaan.
Net rakenethiin siksi ette lymmyttäät sen mitä Spanian varhemat musliimilaiset hallittiijat olthiin rakentanheet.
1 / 3
4. Bled-järvi | Slovenia
Bled-järvi oon kuvanottaajan unistama. Järvi oon Alpiissa Slovenian pohjaisvestassa, likelä kyllää Bled.
Vaarat ja mettät ympäröitteevät tämän idylisen paikan. Bledin linna sijaittee korkkeela järvestä sen pohjaisrannala.
Kaiken tämän kaunheuđen keskikohta oon saari mikä oon järven keskelä. Saaren päärakenus oon kirkko mikä kunnioittaa Neittyt Mariaa.
Kirkon rakenethiin 1600-luvula. Siinä oon 52 meetterii korkkee torni ja 99 porrasaskeletta mikkä nousseevat veđen viereltä.
Jos lähđet Bledin linnhaan, sie saatat nauttiit fantastisesta näkymästä järvele, saarile ja ympäröitteeville vaaranlajile.
Linna oon 1100-luvulta ja sen arkitektuuri oon vaikuttaavaa. Täälä saatat käyđä keskiaikhaisessa museumissa missä oon maalauksii ja mööpeliitä. Sie saatat kans opetella kirjoin pränttäämistä linnan omassa präntissä.
1 / 3
Bledsjøen i Slovenia
5. Meteora | Kreikka
Kreikan tunnethaan sen klosteriista, kirkoista ja muista uskonollisista paikoista. Net oon ushein rakenettu syrjäisille vaaranlajile ja kivisille holmiile merheen.
Yksi näistä oon Meteoran klosterit. Sielä klosterit oon takertunheina kallionseinhään.
Munkit, nunnat ja eremiitit oon asunheet tässä syrjäisessä osassa Kreikkaa kristinuskon alusta asti.
Tyrkin hyökkäyksen uhka pakoitti siirtymhään ylös vaaroile. Het rakenethiin huonheet kivipylvhäile tahi korkkeile kallioile. Piti käyttäät tikkapuita ette päästä klosterhiin.
Nykyjään oon vain kuusi klosterii jäljelä Meteorassa. Niissä saattaa käyđä vaikka muutama munkki ja nunna vielä assuu niissä.
Täälä saatat kattoot vanhoi freskoi eli seinämaalauksii, kaunhiita kapelliita ja hyvin hoiđettui tarhaita.
1 / 3
Meteora i Hellas
6. Plitviče-järvet | Kroatia
Plitviče-järvet Kroatiassa oon 16 järvee ja niitä yhđistäävät vesiputtoukset. Sie saatat kävelä puusilloila mikkä kulkkeevat pitkin ja poikin järviin yli. Sinnuu ympäröittee smaragdinvihrinen vesi mikä oon formanu maisemaa usheitten tuhanssiitten vuossiin aijan.
Järvet oon osa pitkää jokkee mikä virttaa kahđen vaaran välissä. Veđen kalkki anttaa järvile niitten erityisen, vaaleevihrisen färin.
Kalkki painuu pohjale ja luopi jatkuuvasti uussii pattoi jokhiin. Siitä synttyy pienii järvii. Pađot ja järvet muuttuuvat samassa ko vesi virttaa alas ja jättää kalkkii uushiin paikkhoin.
Plitviče-järvet päästhiin UNESCO:n mailmanperintölistale vuona 1979, ja se oon yhä Kroatian populääriin turistinähtävyys.
1 / 3
Plitvice i Kroatia
7. Stonehenge | Iso-Britannia
Stonehenge oon maamerkki Iso-Britanniassa minkä tunnistethaan helposti. Kukhaan ei ole aivan sikkari siitä kunka kivet oon joutunheet sinne.
Kivet oon seisonheet paikalansa vähhiinthään 3500 vuotta. Tuhanet turistit käyvät Stonehengella joka vuosi.
Lähtheet:
- 101 steder du må oppleve (før du dør) (2020)
Orage Forlag AS
Kuvat ja videot:
-
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
