1. Sinun engelskan taito paranee

Sie häyđyt lukkeet ohjheita ja chattaila muitten pellaajiitten kans engelskaksi. Näin sinun kielitaito eđistyy. Piian engelskasta tullee sinun uusi favorittifaaki koulussa.

2. Olet sosiaalinen ja saat uussii ystäviitä

Paljoissa peliissä sie häyđyt tehä yhtheistyötä muitten kans kekkä oon eri maista pois. Piian sie olet tärkkee persoona pelissä joileki kenelä ei ole niin paljon ystäviitä entisestä?

3. Sie tulet seppä ratkaisemhaan vaivoi eli probleemiita

Sie tehet yhtheistyötä ja ratkaiset probleemiita. Mitä kannattaa tehä? Se mitä sie tehet oon tärkkeetä kokonhaisen kaupungin asukkhaile tahi yhđen karateerin koko elämälle.

Sie häyđyt hunteerata strategiita ja taktikkii.

Kunka hankit parhaimat kamppheet?

Kunka voitat viholisen mahđolissiiman noppeesti?

4. Motooriset kyvyt

Ko sie pellaat daattapellii, sie häyđyt olla happela ja seppä sormista, ja sie häyđyt pittää kumppaaki kättä samhaan aikhaan. Sie tarvitten kans hyvvää silmä-käsi-koordinasuunii.

5. Sie opit hallittemhaan stressii

Profesunellit gamerit stressathaan yhtä paljon ko racerpiilin ajjaajat. Se oon kyllä villi ajatus! Sie träänäät rauhalisena pysymistä vaikka oletki stressaavassa tilassa. Tämän trääningin sie otat myötä muihin situasuunhiin.

6. Träänätä tuntheita

Ko sie pellaat kauvoin, sie träänäät tuntheita ko empatiita, katumista, ylppeyttä, tytyväisyyttä, engasementtii, toivottomuutta, hermostunheisuutta, panikkii, sekanusta, eppäilystä, ärrytystä ja katkeruutta.