Meiđän kaunis mailma – Aasia
Meiđän mailmassa oon paljon jännittääviitä paikkoi.
Tässä artikkelissa sie saat opastuut kahđeksen erityisen paikan kans Aasiassa.
1. Shiraz | Iran
Iranissa oon paljon kattomisen arvoista. Paljot oon pölänheet reisata tähän kaunhiisseen maahan, mutta viimi vuosina maa oon ollu turvalinen.
Tämä kuiten muuttui vuona 2022. Nykyjään Norjan esivallat neuvothaan olemhaan reissaamatta Iranhiin.
Iranissa oon joitaki mailman vanhiimista maamerkiistä. Shiraz oon kaupunki kaiken tämän keskelä.
Moskeen Nasir al-Mulkin satheenkariklasit oon erittäin kaunhiit. Valo loistaa klassiin läpi. Ko sie seisot moskeessa, se oon niin ko sie olisit korurassiin sisälä. Moskeen rakenethiin 1800-luvun lopussa.
Likelä oon kravikamari Shah Chéragh. Sen rakenethiin 1100-luvula.
Sinisen kuppelin sisälä oon smaraginvihrinen kamari täynä pikkuissii peilii mikkä kiilttäävät ko valo ossuu niihin. Tämä oon yksi kaunhiimista kokemuksista koko islamilaisessa mailmassa.
1 / 3
Moskeen i Shiraz
2. Pamukkale | Tyrkia
Näitä valkkeita kalkkikivilanttoi mitä saatat nähđä Pamukkalessa ei löyđy misthään muuvalta mailmasta.
Pamukkale oon Tyrkiassa ja oon uskomaton näkö. Luonoliset, kuumat lähtheet oon pumpanheet kalsiumii sisälttäävää vettä maan pinnale 14 000 vuotta. Vesi oon virranu alas vaarankylkkee, höyryny ja luonu valkkeet kalkkikiviaskelheet.
Askelheet saathiin nimen Pamukkale, mikä meinaa tyrkiaksi pumpulivillaa.
1 / 2
Pamukkale i Tyrkia
3. Burj Khalifa | Dubai
Mikä rakenus oon mailman korkkein? Mittaamako met rakenuksen korkkeiman kohđan? Vain oonko se mailman korkkein etaasi mikä oon piđossa? Ja mikä rakenus oikhein oon?
Ko Dubain Burj Khalifan rakenethiin, keskusteluile ei ennää ollu perusta. Tämä rakenus oli kaikkiin korkkein. Korkkein rakenus, korkkein piđetty etaasi, hermostunheimat klassiinpessiijät. Siinä oon asunttoi, konttuuriita, uimasuvanttoi ja restauranttiita.
Burj Khalifa oon 828 meetterii korkkee. Tämä oon yli kaksi kerttaa korkkeempi ko viiminen korkkein rakenus, Taipei 101.
Katto näitä reikäpäitä hyppäämässä lentotuukila Burj Khalifalta:
1 / 3
Burj Khalifa i Dubai
4. Petra | Jordan
Kaupunki Petra sijaittee vaaran Jebel al-Madhbah vieressä Punaismeren ja Kuolumeren välissä. Tämä oon maaginen kaupunki täynä roossii kivvii.
Petran asutethiin 11 000 vuotta aikkaa. Mutta sen alethiin pykkäämhään kunnola vasta ko arabialaiset nomaadit asetuthiin alale vuona 400 e.Kr. Het rikastuthiin kauppaamareittiin kautta mikkä menthiin läpi maan.
Nomaadit kaupathiin silkilä, höystheilä ja pumpulivillala. Het luothiin ihanan kaupungin minkä tunnethaan sen kaunhiista rakenuksista ja haakiista.
1 / 3
Petra i Jordan
5. Ha Long-lahti | Vietnam
Vietnamissa sanothaan ette jumalat oon luonheet Ha Long-lahđen saaret. Suuret kontto-skulptuurit nousthaan turkiisista veđestä. Ko taivas aukkee ja aurinko ittää esile, se tunttuu siltä ko met tuijottaisima suorhaan luomakunttaa.
Legenda muistelee ette vietnamilaisten pääle karsithiin pohjaisesta, ja itte Murhaajadraakin ja sen kläpit lähätethiin auttamhaan.
Draakit sytytethiin tulheen taistelun aikana. Net syljethiin jalokivvii suusta mistä haamustui puolustusmuuri. Se suojeli maata pohjaisen hyökkäyksiltä ijänkaikkisesti. Jalokivet muututhhin maisemaksi ja saariksi mikkä tääpänä oon Ha Long-lahđen rannikolla.
Ha Long-lahđessa assuu nuoin 1000 ihmistä huonetvenheissä. Huonetvenheet oon histoorialinen elämäntavan osoitus.
1 / 3
Ha Long-bukta i Vietnam
6. Taj Mahal | Intia
Taj Mahal oon yksi mailman kaunhiimista rakenuksista. Rakenuksheen liittyy kans kaunis rakkhausmuistelus.
Taj Mahal oon yksi mailman seittemestä ihmheestä, ja yli seittemän miljuunaa ihmistä tullee joka vuosi kattomhaan rakenusta.
Tämän fantastisen rakenuksen rakentaminen kesti 22 vuotta. Se oon 73 meetterii pitkä ja peitetty kiilttäävällä marmorilla ja jalokivilä.
Shahenin vaimo, Mumtaz Mahal, kuoli ko se synnytti heiđän 14. lasta vuona 1631. Shahen kehäytti Taj Mahalin vaimon ijänkaikkiseksi lepopaikaksi ja heiđän rakkhauđen muistoksi.
1 / 3
Taj Mahal i India
7. Angkor Wat | Kambodsja
Kaupunki Angkor oli aikosin aikkaa Khmerriikin pääkaupunki. Kaupungin tunnethaan sen mystisistä temppeliistä.
Kambodian jumalakuninkhaat rakenethiin koko aijan fiinimppii rakenuksii ette näyttäät kunka mahtaavat het olthiin.
Angkor Wat oon temppeliistä suuriin ja se oon hyvin säilyny hindutemppeli. Sen rakenethiin 1100-luvun alussa. Siinä oon viisi tornii mikkä näkkyyvät yli viiđen kilomeetterin päästä.
1 / 3
Angkor Wat i Kambodsja
8. Kiinan muuri | Kiina
Yksi mailman tunnetuimista kohtheista oon Kiinan muuri. Jos sie käyt sielä, saat muiston loppuijäksi.
Muuri oon puolentoista tiiman Beijingin päästä ja se oon nuoin 21 000 kilomeetterii pitkä.
Pykkäämisen aloitethiin vuosina 700 ja 400 e.Kr. Silloin eri kiinalaiset staatit rakenethiin omat muurit ette puolustaat itteensä.
Kiinan ensimäinen keisari, Qin Shi Huang, yhđisti muurit kolmanella vuosisađala e.Kr. Moolina oli estäät hyökkäyksen pohjaisesta.
1300- ja 1600-luvuila rakenethiin vahtitornii ja fästinkkiitä ette vahvistaat muurin entistä paremin.
Paljot kuolthiin ko muurii rakenethiin. Sanothaan, ette heiđät hauđathiin muurin sisäle.
Muuri ei kuiten pystyny pysättämhään kaikkii viholissii. Djengis Khan pääsi muurin läpitte ja valtas Pohjais-Kiinan 1200-luvun alussa. Hänen lapsenlapsi, Kublai Khan, valtas Etelä-Kiinan vuona 1279.
1 / 4
Den kinesiske mur
Lähtheet:
- 101 steder du må oppleve (før du dør) (2020)
Orage Forlag AS
Kuvat ja videot:
-
-
Getty Images
-
Getty Images
-
Getty Images
-
Getty Images / Skydive Dubai – Youtube
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
