Meiđän kaunis mailma – Aasia
Meiđän mailmassa oon paljon jännittääviitä paikkoi mikkä luonto oon formanu. Met ihmiset olema kans luonheet kaunhiita paikkoi.
Tässä artikkelissa sie saat opastuut kahđeksheen erityisheen paikkhaan Aasiassa.
1. Shiraz | Iran
Iran ei piian oli mailman populääriin matkaamakohđet, mutta maala oonki paljon tarjottavvaa. Tällä kaunhiila maala oon ollu huono maino jälkhiin revolusuunin vuona 1979. Sinne oon kuitenki ollu turvalista reisata viimisinnä vuosina.
Tila muuttui dramaattisesti vuona 2022. Nykyjään Norjan esivallat neuvoovat vältämhään Iranhiin reissaamista.
Iranissa oon joitaki mailman vanhiimista maamerkiistä. Kaupunki Shiraz sijaittee kaiken tämän keskelä. Yksi fiiniimistä nähtävistä Iranissa oon moskeen Nasir al-Mulkin satheenkaariklasit. Ko sie seisot kaunhiitten klasimaalausten vieressä ja näjet valon loistaavan moskeen sisäle, se tunttuu siltä ko olis korurassiin sisälä. Moskeen rakenethiin 1800-luvun lopussa.
Likelä oon kravikamari Shah Chéragh. Sen rakenethiin 1100-luvula.
Sinisen kuppelin sisälä oon smaraginvihrinen kamari täynä pikkuissii peilii mikkä kiilttäävät ko valo ossuu niihin. Tämä oon yksi kaunhiimista kokemuksista koko islamilaisessa mailmassa.
1 / 3
Moskeen i Shiraz
2. Pamukkale | Tyrkia
Mailmassa oon yli 1000 mailmanperintökohđetta! Vain yksi niistä oon fantastinen valkkeitten kalkkikivilamppiin ala, mikä virttaa kylhään. Tämä oon Pamukkale.
Pamukkale oon Tyrkian vestassa ja se oon uskomaton näkö. Luonoliset, kuumat lähtheet oon 14 000 vuođen aijan pumpanheet kalsiumii sisälttäävää vettä maan pinnale. Vesi oon virranu alas vaarankylkkee, höyryny ja luonu valkkeet, kalkkikiviaskelheet.
Askelheet oon haamustanheet luonolissii terassiita pitkin laksoo. Paikalisväki oon antanu sille nimen Pamukkale. Se tarkoittaa tyrkiaksi pumpulivillaa.
1 / 2
Pamukkale i Tyrkia
3. Burj Khalifa | Dubai
Ihmiset oon keskustelheet usheitten vuossiin aijan siitä mikä oon mailman korkkein rakenus. Oliko se World Trade Center missä korkkein rakenuskohta oli? Vain oliko se Sears Tower missä mailman korkkein piđetty etaasi? Ja mikä rakenus oikhein oon?
Vuona 2010 ajatteli yksi rakenus ette nyt saapi riittäät! Tästä rakenuksesta tuli kaikkiin korkkein ja se löi kaikki ennätykset. Korkkein rakenus, korkkein piđetty etaasi, hermostunheimat klassiinpessiijät. Rakenus oli Burj Khalifa Dubaissa. Siinä oon asunttoi, konttuuriita, uimasuvanttoi ja restauranttiita.
Burj Khalifa kohhoo 828 meetterin korkkeutheen. Tämä oon yli kaksi kerttaa viimisen korkkeiman rakenuksen korkukainen, Taipei 101.
Burj Khalifan oon rakenettu spiraalihaamuisenna Y:nä nette se kestää tuulen.
Katto näitä reikäpäitä hyppäämässä lentotuukila Burj Khalifalta:
1 / 3
Burj Khalifa i Dubai
4. Petra | Jordan
Kaupunki Petra sijaittee vaaran Jebel al-Madhbahin juurela Punaismeren ja Kuolumeren välissä Jordanissa. Tämä oon roosafärisistä kivistä tehty maaginen kaupunki.
Petran asutethiin ensimäistä kerttaa nuoin 11 000 vuotta aikkaa. Mutta sen tođelinen eđistys alkoi ko heimo arabialaissii nomaadit asettui asumhaan alale vuona 400 e.Kr. Het rikastuthiin kauppaamareittiin kautta mikkä kuljethiin läpi maan.
Nomaadit kaupathiin kiinalaisela silkilä, intialaisilla höystheilä ja pumpulivillala. Het luothiin ihanan mailmankaupungin minkä tunnethaan sen kaunhiista rakenuksista ja haakiista.
1 / 3
Petra i Jordan
5. Ha Long-lahti | Vietnam
Vietnamissa sanothaan ette jumalat oon luonheet Ha Long-lahđen saaret.. Tuuli viskaa satheen aamukonnon läpitte. Suuret skulptuurit nousthaan turkiisista veđestä. Yhtäkkii aukkee taivas ja aurinko ittää esile. Se saattaa tunttuut siltä ko met tuijottaisima suorhaan luomakunttaa.
Legendan jälkhiin vietnamilaissii kiussailthiin jatkuuvat pohjaisesta merentien kautta tulleevat hyökkäykset. Jumalat kylläänythiin lopuksi vaivhaan niin paljon ette het lähätethiin Murhaajadraakin ja sen kläpit auttamhaan.
Viholinen sytytti draakit tulheen taistelun aikana. Draakit syljethiin jalokivvii mistä haamustui puolustusmuuri. Tämä suojeli maata hyökkäyksiltä pohjaisesta ijänkaikkisesti. Jalokivet muututhiin hiljemin maisemaksi ja saariksi mikkä nyt sijaitteevat Ha Long-Lahđen rannikolla.
Ha Long-Lahđessa assuu nuoin 1000 ihmistä huonetvenheissä. Huonetvenheet oon levinheet kolmheen eri huonetvenheenkaupunkhiin ja oon osoitus histoorialisesta elämäntavasta.
1 / 3
Ha Long-bukta i Vietnam
6. Taj Mahal | Intia
Taj Mahal oon yksi mailman kaunhiimista rakenuksista. Rakenuksheen liittyy kans kaunis rakkhausmuistelus.
Taj Mahal oon yksi mailman seittemestä ihmheestä. Se oon kans mailman enniiten käyty maamerkki. Yli seittemen miljuunaa ihmistä käypi Taj Mahalissa joka vuosi.
Mestarityön rakentamisheen 20 000 työteliijältä meni 22 vuotta. Tämä 73 meetterin korkukaisen rakenuksen oon peitetty kiilttäävällä marmorilla ja jalokivilä ja se oon kauheen fantastinen näkö.
Shahenin vaimo, Mumtaz Mahal, kuoli ko se synnytti heiđän 14. lasta vuona 1631. Shahen kehäytti Taj Mahalin vaimon ijänkaikkiseksi lepopaikaksi.
Taj Mahal oon lyhenetty versuuni vaimon nimestä ja se meinaa palassiitten kruunuu. Rakenus oon heiđän rakkhauđen symbooli.
1 / 3
Taj Mahal i India
7. Angkor Wat | Kambodsja
Kaupunki Angkor oli kerran Khmerriikin pääkaupunki. Kaupungin tunnethaan sen arvauksellisista temppeliistä.
Kambodian jumalakuninkhaat rakenethiin koko aijan vaikuttaavamppii rakenuksii ette näyttäät kunka mahtaavat het olthiin.
Angkor Wat oon temppeliistä suuriin. Se oon hyvin säilyny hindutemppeli. Sen rakenethiin 1100-luvun alussa. Temppelissä oon viisi tornii mikkä näkkyyvät yli viiđen kilomeetterin päästä. Angkor What oon mailman suuriimiitten uskonollisten monumenttiisten joukossa.
1 / 3
Angkor Wat i Kambodsja
8. Kiinan muuri | Kiina
Yksi mailman tunnetuimista nähtävistä oon Kiinan muuri. Jos käyt sielä, sie saat muiston loppuijäksi.
Muuri sijaittee nuoin puolentoista tiiman Beijingin päästä ja oon nuoin 21 000 kilomeetterii pitkä.
Rakentamisen aloitethiin joskus vuosina 700 ja 400 e.Kr. Silloin eri kiinalaiset staatit alethiin rakentamhaan ommii muurii ette puolustaat itteensä. Tämä jatkas aina siihen asti ko Kiinan ensimäinen keisari, Qin Shi Huang, yhđisti muurit toinen toisheen kolmanella vuosisađala e.Kr. Tämän tehthiin ette estää hyökkäyksii pohjaisesta.
1300- ja 1600-luvuila rakenethiin vahtitornii ja fästinkkiitä muurhiin ette vahvistaat puolustuksen.
Paljot kuolthiin rakentamisen aikana ja sanothaan, ette heiđät hauđathiin muurin sisäle.
Muurin rakenethiin ette estäät viholisen, mutta se ei menestynny. Djengis Khan pääsi muurin läpitte ja valtas Pohjais-Kiinan 1200-luvun alkupuolela. Djengis Khan oli Mongoliariikin ensimäinen suuri hallittiija. Hänen lapsenlapsi, Kublai Khan, valtas Etelä-Kiinan vuona 1279.
1 / 4
Den kinesiske mur
Lähtheet:
- 101 steder du må oppleve (før du dør) (2020)
Orage Forlag AS
Kuvat ja videot:
-
-
Getty Images
-
Getty Images
-
Getty Images
-
Getty Images / Skydive Dubai – Youtube
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
