Mikä Nato oon?

Mikä Nato oon? NATO ilmestyy jatkuuvasti uutishiin ko keskustelhaan mailman sođista ja konfliktiista, mutta mikä Nato oikkeestansa oon, kekkä kuuluuvat Nathoon ja minkäläiset työtehtävät sillä oon?

Accessibility icon Mikä Nato oon?

Tässä Norjan ulkoministeri Halvard Lange allekirjoittaa sopimuksen …

… ja tästä hetkestä alkkain, 4. aprillikuuta vuona 1949, oon Norja ollu NATO:n jäsen.

Mutta mikä Nato oikkeestansa oon?

Utenriksminister Halvard Lange signerer Atlanterhavspakten på vegne av Norge

Miksi NATO oon olemassa?

Toisen mailmansođan jälkhiin usheet maat haluthiin tehđä yhtheistyötä niin ette vältettäis uussii sottii.

Mailma oli nähny kuinka pahasti USA:n atomipommi tuhos Japanin.

Monet pöläthiin kans ette Sovjettiliitto freistais vallata lissää maita.

Sovjettiliitto oli jo mailman suuriin staatti.

Siksi Norja ja yksitoista muuta maata pääsi yksimielisyytheen siitä ette tehđään yhtheistyötä. Het perustethiin puolustusliiton.

Aprillikuussa vuona 1949 nämät kaksitoista maata allekirjoitethiin Atlantterisopimuksen. Kaikki NATO-maat oon velvoitettu nouđattamhaan tätä sopimusta.

Atlantterisopimuksen tärkkein kohta oon artikla 5. Siinä seissoo: “Asheelista hyökkäystä yhtä tahi usseemppaa liittynyttä maata vasthaan piđethään hyökkäyksennä niitä kaikkii vasthaan.”

Tämä meinaa ette jos yhtheen jäsenmaahan hyökäthään, muut NATO-maat häyttyyvät auttaat.

Nyt usheet maat oon liittynheet Nathoon.

Tääpänä NATO:ssa oon 31 jäsenmaata, ja esimerkiksi Ukraina halluu liittyyt

Flaggene til Natos medlemsland

Forrige avsnitt

1 / 3

Neste avsnitt
4. april 1949 ble Nato stiftet i Washington D.C.
4. april 1949 ble Nato stiftet i Washington D.C.

Mikä NATO oon tääpänä?

NATO:la oon yhä tärkkee rolli ja se pittää huolen siitä ette Vestamaissa oon rauha ja turvalista elläät.

NATO:ssa oon kaksi ossaa: Pohjais-Atlanttinen raati ja Militäärikomitee.

Pohjais-Atlanttinen raati

Tämä oon suuri kokkous jossa kaikki jäsenmaat keskustelleevat mailman turvalisuuđesta. Net puhhuuvat sen ympäri mikä saattaa uhata rauhaa.

Militäärikomitee

Tässä komiteessa istuuvat eri jäsenmaitten puolustuspääliköt. Het anttaavat militäärissii neuvoi Pohjais-Atlanttiselle raatile.

Forrige avsnitt

1 / 3

Neste avsnitt
Natos møterom i Brussel
Natos møterom i Brussel

Kuinka NATO toimii?

Tärkkeintä NATO:ssa oon se ette maat auttaavat toinen toista jos yhđen jäsenmaan pääle hyökäthään.

Samassa NATO:la oon meininkinnä suojela ihmissii, auttaat ihmissii tekemhään yhtheistyötä ja rakenttaat rauhaa mailmassa.

Ko NATO aikkoo päättää jotaki, kaikki jäsenmaat häyttyyvät olla sammaa mieltä.

Jos Norja ja Tanska oon eri mieltä, net häyttyyvät löyttäät ratkaisun josta net oon sammaa mieltä. Silloin NATO saattaa päättäät mitä tehđä

Yksi syistä siihen ette kaikki jäsenmaat häyttyyvät olla sammaa mieltä, oon se ette NATO:la oon vähän ommii sotamiehii.

Sotamiehet jokka NATO lähättäät sothaan, oon sotamiehet itte kustaki jäsenmaasta, esimerkiksi Norjasta.

Forrige avsnitt

1 / 3

Neste avsnitt
Tyrkiske soldater under en Nato-øvelse
Tyrkiske soldater under en Nato-øvelse

NATO sođassa

NATO ei ole osalistunu usheissiin sothiin, mutta kaksi sottaa eroittuu muista:

Kosovon sota ja sota Afghanistanissa.

Kosovon sota vuona 1999

Entisessä Jugoslaviassa Serbia halus ette Kosovo olis osa Serbian staattii, mutta Kosovon kansalaiset ei halunheet sitä.

Tämän tähđen Serbia hyökkäs Kosovhoon. Kosovoalbaanit kärsithiin kaikkiin enniiten tästä.

YK ja NATO puututhiin siksi assiisseen ko het haluthiin pysättäät Serbian hyökkäyksen ja kosovoalbaaniitten kansanmurhan.

Afghanistan

Artiklan 5 oon otettu käytthöön vain kerran NATO:n histooriassa.

Tämä tapattui 11. septemperikuuta vuona 2001 ko terroriorganisasuuni al-Qaida hyökkäs USA:n pääle. NATO sai YK:lta luvan hyökätä al-Qaidan pääle Afghanistanissa.

Forrige avsnitt

1 / 4

Neste avsnitt
Soldater i skogen under Kosovo-krigen i 1999
Soldater i skogen under Kosovo-krigen i 1999

Uusi tila Euroopassa

Ko Ryssä hyökkäs Ukrainaa vasthaan, turvalisuus- ja puolustuspolitikki muuttui Euroopassa.

Sođan takia krannimaat ei ennää luota Rysshään täysin. Net luuraavat kans sitä, hyökäthäänkö niittenki pääle.

Ruotti ja Suomi ei ole ennen olheet NATO:n jäsenet, mutta ko Ryssä hyökkäs Ukrainan pääle, muutethiin Ruotti ja Suomi mielen.

Suomi ja Ruotti hajethiin NATO:n jäsenyyttä 18. maikuuta vuona 2022.

Ko Stoltenberg sai Suomen ja Ruottin hakemukset, kuvvaili hän hetkee “histoorialiseksi”.

Hän sanoi ette NATO:n ovi oon aina auki maile jokka halluuvat auttaat rauhan rakentamisessa.

📷 Ruotti ja Suomi jätethiin hakemukset yhtäaikkaa. Tässä näjemä Suomen ja Ruottin ulkoministerit ja NATO:n genraalisekretäärin.
Forrige avsnitt

1 / 3

Neste avsnitt
Finlands utenriksminister Pekka Haavisto, Natos generalsekretær Jens Stoltenberg og Sveriges utenriksminister Ann Linde
Finlands utenriksminister Pekka Haavisto, Natos generalsekretær Jens Stoltenberg og Sveriges utenriksminister Ann Linde

Mitä Norjan politikkerit ajattelleevat?

Norjan kaksi suuriinta parttiita, Työnväjenparttii ja Oikkee, oon sammaa mieltä siitä ette Norja pittää olla NATO:n jäsen.

Norjan vasemanpuoliset parttiit oon enämen negatiiviset NATO:n suhtheen. Net halluuvat ette Norja pittää olla vähemän henkkaavainen USA:sta. Net meinaavat kans ette mailmanrauhaa ei sauteta sotimisela..

📷  Kuningas Harald ja NATO:n generaalisekretääri, Jens Stoltenberg, katteleevat ko demonstreerathaan hävittääjäflyyi F-35 Joint Strike Fighterii vasthaan.
Kong Harald og Natos generalsekretær Jens Stoltenberg følger med under en demonstrasjon av jagerflyet F-35 Joint Strike Fighter
Kong Harald og Natos generalsekretær Jens Stoltenberg følger med under en demonstrasjon av jagerflyet F-35 Joint Strike Fighter

Kalttiit:

  • Cooper, Camilla Guldahl: NATO i Store norske leksikon på snl.no.
    Hentet 8. mars 2022 fra https://snl.no/NATO

Kuvat ja videot:

    1. NATO
    2. NATO / NATO – YouTube
    3. NATO
    4. NATO
    5. Getty Images
    6. NATO
    7. NATO