Sananvaphaus – Saatamako sannoot sitä mitä halluuma?

Sananvaphaus anttaa meile oikkeuđen sannoot sitä mitä meinaama. Mutta saatamako sannoot justhiin sitä mitä halluuma?

Accessibility icon Sananvaphaus – Saatamako sannoot sitä mitä halluuma?

Mitä sananvaphaus oon?

Kuvittele ette sie et sais sannoot sitä mitä sie halluut klassissa. Kuvittele ette sie saisit rangaistuksen jos sie kirjoittaisit jotaki sosiaalishiin meedihoin.

Pohjaismaissa met emmä tarvitte pölätä tätä niin paljon. Met asuma demokratioissa jokka pittäävät huolta sananvaphauđesta.

Sananvaphaus oon sinun oikkeus näihin assiissiin:

  • Sannoot ittesti meiningin, niin kauvoin ko se ei ole vihamielinen tahi diskrimineeraava
  • Vasthaanottaat ja jakkaat tiettoo

Tie sananvaphautheen

Meilä ei ole aina ollu luppaa sannoot sitä mitä halluuma.

Vasta toisen mailmansođan jälkhiin YK hyväksyi ihmisoikkeusdeklarasuunin jossa sananvaphaus oli tärkkee osa.

Artikla 19

“Jokhaisella oon oikkeus mielipitheesseen ja sen esile tuomisheen. Tämä oikkeus pittää sisälä vaphauđen pittäät omat meiningit ilman ette toiset sekkainttuuvat niihin, ja vaphauđen hakkeet, ottaat vasthaan ja jakkaat tiettoo ja ajatuksii minkä tahansa tietokanaalin läpi maitten rajoista perustamatta.”

Journalistiila ei ole aina ollu luppaa kirjoittaat sitä mitä het halluuvat.

Joskus vissin maan johtaajat vihastuuvat jos het lukkeevat jotaki negatiivista ittensä ympäri. Silloin het saattaavat pakoittaat journalistit muuttamhaan tekstii positiiviseksi. Tätä käskethään sensuuriksi.

Usheet journalistit oon pantu fankilhaan niitten kirjoitusten tähđen.

Forrige avsnitt

1 / 3

Neste avsnitt

Oonko sananvaphaus uhan alla tääpänä?

Usheissa maissa politikkeriita ja journalistiita sensureerathaan ko het kritiseeraavat hallitusta. Het ei saa kirjoittaat sitä mitä het halluuvat. Het saattaavat jopa jouttuut fankilhaan.

Usheita ryssäläissii journalistiita oon uhattu siksi ko het oon kirjoittanheet negatiivissii assiita presidentin Vladimir Putinin ympäri. Jopa miljööaktivisti Greta Thunbergii oon uhattu siksi ko hän puhhuu kliimamuutosten ympäri.

Je suis Charlie

Sananvaphaus oon kans uhan alla maissa jokka muistuttaavat Norjaa.

Täälä eri roikat freistaavat pölättäät ihmissii niin ette het ei tohi sannoot ittensä meininkkiitä.

Vuona 2015 kaksitoista ihmistä surmathiin Pariisissa siksi ko het olthiin publiseeranheet vitsipiirustuksii Islamin profeetta Muhamedista. Surmatut työtelthiin aviisi Charlie Hebdossa.

Missä kulkkee raja?

Missä kulkkee raja sille mitä saattaa sannoot? Se oon vaikkee kysymys. Laki puolustaa sananvaphautta. Mutta kaikkee ei saa sannoot.

Joskus ihmiset kirjoittaavat vihamellinkkiitä. Saamelaiset, kväänit ja muut minoriteetit Norjassa kokkeevat ushein sellaista sosiaalisissa meedioissa. Silloin Norjan laki häyttyy suojela heitä.

Forrige avsnitt

1 / 1

Neste avsnitt

Uskonollinen viha ja Koraanin poltto oon vaikkee dilemma

Ko demonstrantti poltti Koraanin Tukholmassa, musliimit ympäri mailman olthiin raivostunheet.

Oonko Koraanin poltto teko jonka piđethään kielttäät siksi ko se oon uskonollista vihhaa?

Vain oonko tämä sananvaphautta ko kaikki saattaa sannoot ja meinata sitä mitä halluu?

Monet meinaavat ette uskonollisten kirjoin tuhhoominen, ja olletikki Koraanin poltto, oon laiton teko.

Jos sie et tykkää siitä mitä kirjassa seissoo, sie saatat puhhuut sen ympäri mistä sie et tykkää, mutta älä polta kirjaa.

Met saatama kans huntteerata mitä oon viisasta tehđä, vaikka se ei olis kieletty.

Ruottin esivallat meinaavat ette Koraanin poltto oon osa sananvaphautta.

Norjassa kirjan poltto ei ole kieletty, vaikka kirja olis tärkkee ja pyhä kirja joileki. Siitä huolimatta pulettija ei ole antanu siihen luppaa. Se oon uhka “turvalisuuđelle”.

Suomessa uskonollisen rauhan rikkominen oon kieletty, ja siksi Koraanin poltto oon kans kieletty.

Forrige avsnitt

1 / 3

Neste avsnitt

Kuinka met saatama puolustaat sananvaphautta?

Oon usheita tappoi puolustaat sananvaphautta.

Kaikkiin maitten staatinjohtaajat piđettäis tulla yksimielisyytheen samanlaisista lajista. Journalistiila pitäis olla luppaa kirjoittaat sen ympäri mitä het halluuvat niin kauvoin ko lausunot ei ole vihamieliset.

Lisäksi oon tärkkeetä anttaat ilmi vihamielissii lausunttoi. Met emmä piđä pölättäät puhhuut sen ympäri toisten kans.

Kalttiit:

  • Faktisk.no (31.08.2020): SIAN brente ikke Koranen på demonstrasjonen i Oslo i helgen. https://www.faktisk.no/artikler/26l/sian-brente-ikke-koranen-pa-demonstrasjonen-i-oslo-i-helgen

Kuvat ja videot:

    1. Getty Images
    2. Getty Images
    3. NRK
    4. FN
    5. European Parliament (CC BY 2.0) 
    6. Foto: Sébastien Amiet (CC BY 2.0) 
    7. Getty Images
    8. Getty Images
    9. Getty Images