Dei første husa

Då folk oppdaga at dei kunne dyrka mat og halda husdyr, byrja dei å byggja hus og bu fast på ein stad. Husa blei bygde av alle slags ting frå naturen, men oftast leire. Ei blanding av leire, halm og kumøkk blei klint på eit flettverk av kvistar – det gav sterke og tette veggar som heldt dei som budde der varme og tørre. Der det ikkje fanst tre, til dømes på Orknøyene, blei både hus og møbel bygde av stein.

Dei første byane

Çatalhöyük i Tyrkia er bygd av murstein laga av gjørme som fekk tørka i sola. Dette er ei av dei største busetjingane som er oppdaga. Her har det truleg budd 8000 menneske. Husa låg nær myrområde der folk henta vatn og byggjematerialar. Å bu så mange saman verna dei mot fiendar, og folk kunne dela på arbeidet.

⬅  Çatalhöyük er på verdsarvlista til UNESCO og er i dag eit område kor mange arkeologar driv med utgravingar. 

Hardt byliv i Çatalhöyük

Çatalhöyük var ein av dei første byane i verda, men innbyggjarane oppførte seg ikkje spesielt bra. Byen blei overfolka, og det førte til vald. På hovudskallar har ein funne slagskadar og brot som har grodd. Mange av offera var kvinner. Leirkuler som er funne på staden ser ut til å passa til skadane, og dei kan ha blitt brukte som kuler i ein sprettert. Det at folk og dyr budde så tett, kan også ha gjeve ein auke i fare for sjukdommar.

Grunnlaget for sivilisasjonen

Livet var framleis ganske enkelt i steinalderbyane, men folk likte å leva på denne måten, og det skulle leggja grunnlaget for samfunnet vårt slik me kjenner det.