Mitä oon vihreepeso?

Miljööystävällinen, kantamavoimainen ja kliimanöitraali oon sanat jokka liimathaan kaikkheen, niin ko hammasharjhoin ja biilhiin. Met halluuma kaupata miljööystävällisesti, mutta pittäävätkö myyjät sen mitä het luppaavat?

Accessibility icon Mitä oon vihreepeso?

Shoppaile hyvälä omalatunnola?

Ajattele ette sie löyđät housut jokka sie halluut saađa vaikka väkisten. Net oon täyđeliset ja tekkeevät sinun onneliseksi. Mutta sinula oon jo kahđekset housut kaapissa, ja sie tieđät ette se oon vahingollista miljööle shoppaila liikkaa.

Mutta kattopa, housut oon merkattu kilkula “laitettu ökoloogisesta ja eettisestä pumpulista”. Eli sittehän oon kaikki reilassa?

Jente som sitter i sofaen og holder en jeans hun har pakket opp og kjøpt på nettet
Jente som sitter i sofaen og holder en jeans hun har pakket opp og kjøpt på nettet

Vihrinen oon «pop»

Monet halluuvat pittäät huolen mailmasta paremin. Met käskemä sitä vihriseksi vaiheeksi.

Met freistaama elläät niin ette met emmä vahingoita luonttoo tahi tehe muitten ihmisten elämää huonomaksi muuvala mailmassa. Esimerkiksi jos sie aijot ostaat uussii vaattheita, häyttyyvät net kukka laittaavat vaattheita saađa oikkeuđenmukaisen tienastin.

Net kukka myyvät meile vaattheita oon kans tietoiset vihrisestä vaiheesta. Nykyjään myyđhään paljon tavaraa mikkä oon miljööystävällisemmät. Miksi? Ko met kuluttaajat halluuma valita oikhein.

Mitä oon kantamakykyinen eđistys?

Forrige avsnitt

1 / 2

Neste avsnitt
Flere klær som henger på en stang og en lapp som leser 100% organisk
Flere klær som henger på en stang og en lapp som leser 100% organisk

Oonko se mitä ostama miljööystävällinen?

Se ei ole lupa puijata ostaajaa Norjassa.

Met näjemä kuitenki reklaamiita mikkä lissäileevät kuinka miljööystävälliset vissit tavarat oon.

Het kukka laittaavat tavaroita, oon tulheet miljööystävällisemmiksi, mutta net häyttyyvät tođistaat ette se oon hyvä maapallole. Muutoin sanat oon tyyhät. Tätä käskethään kans “vihreepesoksi”.

Sie saat muutaman esimerkin siitä nyt.

Forrige avsnitt

1 / 2

Neste avsnitt
Tre barn som bærer handleposer hjem
Tre barn som bærer handleposer hjem

Vaattheet

YK sannoo ette se oon tyhä öljyindustrii jolla oon suuremat uloslaskut ko vaatetindustriila. Tämän lisäksi lähtee vaattheista mikrofiiberii ja myrkkyainheita ko met piđämä ja pesemä niitä.

Ko usheita vaattheita oon merkattu kilkuila miljööystävällinen ja kestäävä, se oon monesti tyhä freistaus ette met ostaisimma vaattheita hyvälä omalatunnola.

Masse fargerike klær på stativ og liggende på gulvet
Masse fargerike klær på stativ og liggende på gulvet

Hoppuruoka

Met näjemä paljon roskaa luonossa mikä tullee Burger King- ja McDonalds-tyyppisistä hoppuruokafirmoista. Pappi ja plastikki jäävät makkaamhaan surulisina jälkinä kraavhiin ja käymäteile. Paljon roskaa jouttuu kans merhiin.

Jokku burgerifirmat päätethiin heittäät pitämästä plastikki-imupillii. Net tehthiin sen itte assiissa jo ennen ko nämät kielethiin.

Tämä oon askelet etheenkäsin, mutta se oon vielä paljon mitä saatettais tehđä paremin.

Engangskrus med lokk og sugerør som ligger på bakken
Engangskrus med lokk og sugerør som ligger på bakken

Liha

Muutamisti meedioissa esitethään kuinka sikapuunat ei kohtele sikkoi hyvin. Kuvat sijoista jokka kärssiivät, tekkeevät monet ihmiset vihaisiksi.

Tämmöisten ylikirjoitusten jälkhiin met näjemä suurii kampanjoita missä puunat vannoovat meile ette heiđän elläimillä mennee hyvin. Met emmä kuitenkhaan tieđä mitä het oon tehnheet ette se menis paremin elläimiitten kans.

Tämä oon vihreepessoo. Het käyttäävät hyväksi meiđän toivomuksii siitä ette elläimillä olis hyvä elämä.

Fire griser som kikker ut bak et gjerde
Fire griser som kikker ut bak et gjerde

Flyyit

Flyyilä reissaaminen oon kaikkiin vahingollissiin tapa reisata jos ajattelema uloslaskui jokka oon vahingolliset maapallole. Halvat lentomatkat houkutelleevat meitä lentämhään vielä enämen.

Flyyiselskaapit jokka myyvät halppoi lentomatkoi sannoovat ette net oon kliimaystävälliset ja “vihriset”, mutta tämä ei saata koskhaan olla totta. Flyyilä reissaaminen ei ole miljööystävällistä.

Net freistaavat puijata meitä uskomhaan ette met saatama reisata flyyilä hyvälä omalatunnola, ja tämä oon klassilinen esimerkki vihreepesosta.

Passasjerfly som tar av i solnedgang
Passasjerfly som tar av i solnedgang

Öljy

Öljy oon kauheen vahingollista luonole, mutta öljyindustrii halluu kans olla myötä vihrisessä vaiheessa.

Net sannoovat ette Norjan öljykentät oon vihriset ko niitten uloslaskut oon mailman mataliimat. Tämä johtuu siitä ette platformit triivathaan vesivoiman avula fastamaalta käsin.

Mutta se ei auta kovin paljon, ko se öljy mitä pumpathaan ylös, oon yksi suuriimista syistä mailman kliimakriishiin.

Forrige avsnitt

1 / 2

Neste avsnitt
Oljeplatform med vindmøller rundt
Oljeplatform med vindmøller rundt

Usheet tekkeevät paljon hyvvää

Vaikka vihreepeso saattaa puijata meitä pikkuisen, se oon kans monet jokka eđesauttaavat vihrisessä vaiheessa. Esimerkiksi net jokka valmistaavat vaattheita oon alkanheet panemhaan enämen painoo uuđestipiđole ja kliimaystävällisille tekstiiliile.

Hoppuruokafirmat oon vaihettanheet plastikki-imupillit paperi-imupillhiin.

Paljon oon tapattunnu uussiin lakkiin ja määräysten takia. Kliima ja kantamakyky oon tärkkeetä meile kuluttaajile.

Mange papirsugerør i et glass
Mange papirsugerør i et glass

Kaikki saattaavat tulla tietoisemmiksi

Se oon populääriii olla miljöötietoinen ja se oon hyvä assii. Mutta jos tämä oon jotaki mitä met tyhä sanoma emmäkä tehe, ei net sanat tarkoita kovin paljoo.

Kukhaan ei saata tehđä kaikkee oikhein koko aijan, mutta jokhainen saattaa tehđä vähäisen ja se mitä sie tehet oon tärkkeetä.

Unicefin filmi:

YK:n kantamakykymoolit haastaavat sinun! Vaikka filmi ei ole kväänin kielelä, sie saatat kattoot sen norjaksi tahi suomeksi:

 

Forrige avsnitt

1 / 2

Neste avsnitt
Grønn hånd som holder et tre ved tørr jord og trestubber
Grønn hånd som holder et tre ved tørr jord og trestubber

Kalttiit:

  • FN-sambandet (24. august 2021): FNs rapport: En alarm for menneskeheten.
    https://www.fn.no/nyheter/fns-klimarapport-en-alarm-for-menneskeheten

Kuva- ja video-oikkeuđet:

    1. Getty Images
    2. Getty Images
    3. FN-sambandet Norge – YouTube
    4. Getty Images
    5. Getty Images
    6. Getty Images
    7. Getty Images
    8. Getty Images
    9. Getty Images
    10. Getty Images
    11. Getty Images
    12. UNICEF Norge – YouTube