Algoritmar avgjer kva du les

Korleis trur du YouTube får til å vise deg akkurat det du er interessert i? Og korleis kan det ha seg at Google gir deg andre søkjeresultat enn dei vennene dine får, når de søkjer på akkurat det same?

Svaret er algoritmar. Dette er avanserte reknestykke som klarer å leite seg fram til dei videoane og søkjeresultata som kan passe for akkurat deg.

døme

Korleis  opnar ein ei dør?

For oss menneske er det ganske enkelt å opne ei dør. Men viss ein robot skulle ha gjort det, treng han ei oppskrift – ein algoritme – for korleis døra skal opnast:

1. 1. Gå bort til døra.

   2. Ta tak i dørhandtaket.

   3. Skyv handtaket ned.

   4. Trekk døra mot deg.

Men ikkje alle dører kan opnast i vår retning, og det er mykje anna som kan kome i vegen også. Derfor treng algoritmane vanlegvis mange fleire kodelinjer som tek høgd for ulike moglegheiter.

Filterbobler og ekkokammer

Dermed kan du bli sitjande fast i ei såkalt filterboble, der du berre får sjå nyheiter som bekreftar det du allereie meiner. Slike bobler kan i tillegg vere prega av falske nyheiter. Det er fordi dette er innhald mange deler og trykkjer «liker» på, og dermed trur algoritmane at folk vil sjå meir av det.

Dette kan også gjere at det oppstår såkalte ekkokammer, der folk med dei same meiningane berre ser kvarandre sine idear og oppfatningar. Dette kan føre til ei forsterking av desse meiningane innanfor gruppa, mens avstanden til andre grupper aukar. Dette kallar vi polarisering.