1. Sinusta tullee seppä engelskassa

Monessa pelissä sie häyđyt lukkeet instruksiita ja chattaila muitten pellaajiitten kans engelskaksi. Silloin sinusta tullee seppä kielissä ilman ette sie hunteeraat sitä. Jokku tulleevat niin sepäksi engelskassa ette siitä tullee heiđän uusi favorittifaaki koulussa ko heistä oon tulheet niin sepät siinä.

2. Olet sosiaalinen ja saat uussii ystäviitä

 Monessa pelissä sie häyđyt tehđä yhtheistyötä muitten kans jokka oon eri maista pois. Teistä tullee joukko mikä kuuluu yhtheen. Piian sie olet tärkkee persoona pelissä jolleki kenelä ei ole niin paljon ystäviitä entiseltä?

3. Sinusta tullee seppä ratkaisemhaan probleemiita

Sinusta tullee seppä tekemhään yhtheistyötä ja ratkaisemhaan probleemiita. Sie häyđyt hunteerata etikkii. Piian sinun päätös vaikuttaa yhđen kaupungin assuujiitten elämhään, tahi yhđen karakteerin tulleevaisuutheen?

Sie häyđyt hunteerata strategiita ja taktikkii.

Kuinka hankit parhaimat kamppheet? Kuinka voitat viholisen mahđolissiiman noppeesti?

4. Motooriset taiđot

Ko sie pellaat daattapellii, sie häyđyt olla happela ja seppä sormiin kans, ja sie häyđyt pittäät kumppaaki kättä samhaan aikhaan. Sinun silmä-käsi-koordinasuuni kans eđistyy. Nämät saattaavat olla hyvät taiđot gymnastikkitiimoissa.

5. Sie opit hanteeraamhaan stressii

Profesunellit daattapelin pellaajat eli gamerit kokkeevat yhtä paljon stressii ko racerbiilin ajjaajat. Se oon kyllä villi ajatus! Hobbygaming ei ole yhtä vaattiivaa, mutta sie kojet vähäsen sammaa stressii. Sie saat trääninkkii siinä ette olet rauhalinen  ja tehet tehtäviitä ilman stressaamatta. Nämät kokemukset saatat ottaat myötä uushiin tilhoin.

6. Träänätä tuntheita

Ko sie pellaat kauvoin, sie träänäät tuntheita niin ko empatiaa, katumista, ylppeyttä, tytyväisyyttä, engasementtii, neuvottomuutta, toivottomuutta, nervösiteettii, panikkii, sekkaanusta, eppäilyy, frustrasuunii, ärrytystä ja katkeruutta.