Meiđän kaunis mailma – Oseania
Meiđän mailmassa oon lukemattomiita uniikkiita, mystissii ja kaunhiita paikkoi. Luonto oon formanu meiđän maisemaa ympärillämä miljuuniitten vuossiin aikana ja met ihmiset olema kans kaunistelheet maisemaa loistaavalla arkitektuurilla ja kaunhiila taiđettöilä.
Tässä artikkelissa näytämä esimerkkiitä Oseaniasta. Tässä sie saat opastuut 7 erityisheen paikkhaan Oseaniassa.
Bora Bora med palmetrær, blå himmel og blått hav.
1. Great Barrier Reef | Austraalia
Great Barrier Reef oon mailman suuriin korallipankki. Koralli oon pikkuinen kovakuorinen elävä mikä assuu meressä.
Korallipankki synttyy paikoissa mihin nämät elävät kokkoonttuuvat laumoittain. Korallit näytethään färirikkhailta kukoilta. Great Barrier Reefissä oon 3000 tämmöistä korallipankkii ja sen näkkee kiini avaruuđesta asti. Mutta kommeinta oon studeerata korallipankin yli 2000 kalalajjii klasipohjaisesta venheestä tahi meren pinnalta sukaluspuvussa snorkkelin avula.
Great Barrier Reef oon ko valttaava akvariumi. Siinä assuu ellääviitä koralliita ja anemooniita, ja färirikkhaisissa korallissa lymmyilhään klovnikalat ja haijit. Sinun pään yläpuolela lenteleevät pelikaanit ja jos sie olet lykylinen, sie saatat nähđä hyppääviitä delfiiniitä tahi valhaita aalttoin välissä.
Great Barrier Reefin vesissä sukaltaminen ja snorklaaminen oon fantastinen elämys, oletpa sitte kokenu sukalttaaja tahi vasta-alkkaaja joka halluu kokkeila ensimäistä kerttaa. Pankki oon hirmuinen ja tutkittavviita paikkoi oon paljon. Veđen temperatuuri oon mielyttäävän lämmin ympäri vuođen.
Jos sie olet oikhein eeventyyrinhaluinen, sie saatat tutkiskella SS Yongalaa mikä oon vuona 1911 uponu matkustaajalaiva. Tätä piđethään yhtenä mailman parhaista hylkkyin sukaluskohtheista.
1 / 3
Mann dykker i korallrev med røde fisker rundt seg.
2. Franz Josef-jäätikkö | New Zealanti
Franz Josef-jäätikkö oon yksi New Zealanin kolmesta jäätiköstä. Se oon 12 kilomeetterin pitukainen ja se sijaittee vain muutaman sađan meetterin rannikon päästä. Se mikä oon erikoista tässä oon se ette sie saatat kävelä jäätikön päälä aamupäivälä ja pittäät sommaa rannala iltapäivälä.
Nimi taittaa ihmetyttäät sinnuu vähäsen, mutta sen oon antanu tyskäläinen joka tutki jäätikköö vuona 1865. Hän nimitti jäätikön Öystäriikin keisarin Franz Josef I jälkhiin.
Franz Josef-jäätikön tunnethaan kans nimelä Ka Roimata o Hine Hukatere. Se tarkoittaa Hine Hukateren jäätynheitä kyynelheitä maorin kielelä. Maorit oon New Zealanin alkupöräiskansa.
Lumiprinsessa Hine Hukatere rakastui legendan jälkhiin tavalisheen mieheen nimeltä Wawe. Het menthiin Aoranghiin, mikä oon vaara missä heimojumalat assuuva, ette pyyttäät heitä muuttamhaan lumiprinsessan ihmiseseksi. Kostonankara ilmajumala Tawhirimatea tölmäs Wawen vaaralta varmhaan kuolemhaan. Hine Hukateren kyynelheet fomathiin jäätikön.
Franz Josef-jäätikkö liikkuu jopa 50 senttimeetterii päivässä, mutta se oon tapattunnu ette jäätikkö oon liikkunu peräti nelje meetterii yhđessä päivässä.
Jäätikön alla oon luoliin, jäätikönhalkkeemiitten ja tunneliitten verkko mikä muuttuu päivästä toisheen. Siksi yksikhään jäätikkövajelus ole koskhaan samanlainen ko viimi vajelus.
1 / 3
Franz Josef isbreen på New Zealand.
3. Samoa | Tyvenmeri
Samoa oon pieni saariryhmä Tyvenmeressä. Pääattraksuunina oon saaren fantastiset maisemat: krystallinkirkkhaat veđet, valkkeet rannat, rehevät mettät ja vilkkhaat kurkkiit.
📷 Kuvateksti: Tradisunelli rantahuonet Samoassa.
To Sua Ocean Trench oon yksi Samoan kohtheista mikä vettää enniiten ihmissii. Se oon fasineeraava tulivaaralinen fenomeeni missä oon kaksi valttaavaa kuoppaa mitä yhđistää luola.
Yksi kuopista oon nykyjään suvanon syvykäinen. Sekä turistit ette paikaliset käyvät uimassa sielä.
Samoan pääkaupunki Apia oon saarela Upola. Siinä oon lummoova, trooppinen hamina missä oon paras paikka tutustuut samoalaisheen elämäntaphaan.
Samoan kulttuurisentterissä saat nähđä autenttista käsityötä, ruvanlaittoo ja sepän tattovöörin tekemässä tattoveerinkkii rohkeile turistiile.
Apia oon paras paikka kokkeet fiafia-illan perintheisten lauluin ja tanssiin, färirikkhaitten kostyymiitten ja herkulisen päivälisen parissa.
1 / 4
Strand på Samoa med tradisjonelt strandhus.
4. Lake Hillier | Austraalia
Lake Hillier oon Middle Islandin-saarela sijatteeva järvi, ihan Australian vestarannikon ulkopuolela. Se oon färilthään kirkkhaanroosa ympäri vuođen. Toistaiseksi tutkiijat ei ole sikkari mistä se johtuu.
Jokku luuleevat ette se johtuu veđessä olleevasta bakteerista ko taas toiset luuleevat ette syy oon mikroalgissa Dunaliella salina.
Järvi tekkee vaikutuksen ja se oon uskomaton näkö, olletikki ko se sijaittee vain muutaman meetterin Tyvenmeren päästä mikä oon yhtä sininen ko se aina oon ollu. Kontrasti niitten välilä oon sekä hämmästyttäävä ette fasineeraava ylhäältä kattottunna.
Lake Hillier ei ole mailman ainua roosa järvi, mutta se mikä tekkee sen uniikin oon se ette veđen färi ei muutu jos sitä kaađethaan flakshuun tahi klashiin.
Lake Hillierin löysi briittiläinen eventyyräri Matthew Flinders vuona 1802 ja sai nimen William Hillierin jälkhiin. Tämä oli Flinderin myötä reisula, mutta hän valitettavasti kuoli sen aikana.
Lake Hillier oon pieni järvi. Vain nuoin 600 kerttaa 250 meetterii. Järvestä kaivethiin suolaa nuoin kuuđen vuođen aijan, mutta sen häyđythiin lopettaat ko huomathiin ette suola oli niin myrkylistä ettei ihminen piđä syöđä sitä.
1 / 3
Lake Hillier i Australia med sitt rosa vann, ligger rett ved siden av Stillehavet som er knall blått.
5. Rotorua | New Zealanti
Rotorua oon kaupunki New Zealanin pohjaissiimala saarela. Täältä löyttyy mailman rauhalissiimppii kuumii lähtheitä ja rapakkopaattii ja yksi mailman parhaista lattuista offroadsykläämistä varten.
Kaupungin tunnethaan kans truiskuuvasta geysiristä. Geysir oon kiehuuvaa vettä joka truiskuu maasta ylös. Tätä tapattuu vähhiinthään 20 kerttaa janturissa! Jos tämä ei vielä ole nokko, saatat kokkeet täälä sattoi vuossii vanhaata maorilaista kulttuurii.
Rorotua oon keskelä tulivaara-allaa ja se oon itte assiissa rohki hyvä etu. Kuumaa gassii maan sisästä puristethaan vaarasta ja lämmittää alan luonoliset suvanot. Veđen temperatuuri täälä oon 35 graadii.
Halluisitko kokkeila rapakkopaatissa käymistä? Tämmöinen paati saattaa tehđä hyvvää sinun ihole. Lisäksi saatat kattoot sivvu mailman suuriinta kuumaa köngästä. Usheimat assiit Rotoruassa oon siis okhein kuumaa!
1 / 3
6. Sydney | Austraalia
Sydneytä piđethään yhtenä mailman kaunhiimista ja mahtaaviimista kaupungiista. Ennen kaikkee ikoonisen Sydney Harbourin Sillan ja oopperahuonheen takia.
Silla oon usheile opas sen mahtaavista ilotulitusraketiista uuđenvuođenaattona. Oopperahuonet oon Australian tunnetuin maamerkki.
St. Maryn katedraali oon kans vierailun arvoinen paikka. Ennen kaikkee ette kattoskella klasimaalauksiita ja ette kuula kirkkokuoron laulaavan sunnuntaisin. Joulun aikhaan kirkon valaisthaan fantastisela vaalonäyttelyllä.
Sydneyssä oon paljon kojettavvaa. Täältä löyđät esimerkiksi Royal Botanic Gardenin missä oon linttui, pörhöissii, reptiiliitä ja kalloi.
New South Walesin taiđetgalleriissa kannattaa kans vieraila.
Jos sie olet auringon ja kesän ystävä, niin sie saatat käyđä yli 100 rannala Sydneyssä. Tunnetuin taittaa olla Bondi Beach.
1 / 3
7. Uluru | Austraalia
Keskelä laakkeeta ja kuivaa auttiita näkkyy jotaki aivan erityistä. Uluru, käsketty kans Ayerin Rockiksi, oon populääri turistinähtävyys mikä ulottuu 348 meetterin korkkeutheen.
Vaara näyttäyttyy oransin ja punaisen kiiluuvissa färiissä austraalialaisen auringon paistaissa vaarale.
Austraalian alkupöräiskansa, aborgiinit, omistaa vaaran. Oon helppo ymmärttäät miksi het pittäävät tätä vaaraa pyhänä paikkana.
Turistit oon vuosikymmeniitten aijan kiikkunheet Ulurun lajele muun myötä siksi ette nähđä auringonnousun vaaran lajelta. Aborgiiniitten pyhhään paikkhaan alethiin kokkoontumhaan liikkaa turistiita, ja sen takia vuođesta 2019 saakka oon ollu voimassa laki mikä kielttää vaaran lajele kiikkumisen.
Paljot kierttäävät kuitenki eđelheen käyven vaaran juuren ympäri, 9,4 kilomeetterin kävelymatka missä saattaa kattoot fasineeraavii luolamaalauksii mikkä aborgiinit maalathiin yli 5000 vuotta aikkaa.
| Vaikka vaara sijaittee keskelä auttiita, Ulurussa oon runshaasti villielävii. Täältä löyttyy yli 170 lintulajjii, kymmenittäin reptiililajji ja yli 20 eri imuelävää. Jos sinula käypi tuuri, saatat nähđä fasineeraavii luolamaalauksii, kenguruita tahi harvinaissii, färirikkhaita linttui. |
1 / 3
Det røde fjellet Mount Connor i Australia
Lähtheet:
- 101 steder du må oppleve (før du dør) (2020)
Orage Forlag AS
Kuva- ja video-oikkeuđet:
-
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
Getty Images
-
