Mikä YN oon?
24. oktooperikuuta joka vuosi markkeerathaan YN-päivää koko mailmassa. Mutta mikä YN oon, ja mikkä tehtävät YN:llä oikkeestansa oon?
Moolina varmistaat ikuisen rauhan
Yhđistynheet Nasuunit (YN) perustethiin heti toisen mailmansođan jälkhiin ja sen päämoolina oli välttäät sođat tulleevaisuuđessa.
Sen jälkhiin ko se oli ollu kaksi mailmansottaa tyhä muutaman vuosikymmenen aikana, päätti 51 maata allekirjoittaat YN-paktin. Paktissa kuvvailhaan sitä kuinka maat saattaavat varmistaat rauhan staattiin välilä, vähenttäät ökonoomissii ja sosiaalissii erroi mailmassa ja varmistaat kaikile ihmisille samat oikkeuđet.
📷 Wilhelm Munthe Morgenstierne, ambassadööri ja norjalainen delegaatti, allekirjoittaa YN-paktin seremoniissa San Franciscossa 2. juunikuuta vuona 1945.
Yksi kaikkiin – kaikki yhđen puolesta
YN oon globaali kanssoinvälinen organisasuuni jonka perustethiin vuona 1945. Vuona 2022 oli organisasuunissa 193 jäsenmaata. Se oon tyhä muutama poikkeema, niin ko Vatikaanistaatti Roomassa, muuten oon kaikki mailman suvereenit staatit jäsenet YN:ssa.
YN:n pääkontturi oon New Yorkissa, USA:ssa. Jäsenmaitten johtaajat kokkoonttuuvat joka vuosi YN-rakenuksheen jossa het keskustelleevat, kritiseeraavat toinen toista, tahi freistaavat tulla yhtheisymmäryksheen siitä mikkä reekelit jälläävät kanssoinvälisessä politikissa.
Jos jotaki päätöksii tehđään, häyttyyvät jäsenmaat olla yksituumaiset, ja ko myötä oon niin paljon erilaissii maita, se ei ole tasan niin helppoo.
Yhtheistyö turvaliseman mailman puolesta
Mailma saattaa näyttäät synkältä nykyaikhaan, mutta se oon toivoo ko kattoo sitä humanitääristä ja rauhanturvaavaa työtä mitä tehđään ympäri mailmaa.
1 / 3
Wilhelm Munthe Morgenstierne, ambassadør og norsk delegat, signerer FN-pakten ved en seremoni i San Francisco 2. juni 1945.
Mikä YN:n työ oikhein oon?
YN:n tärkkein tehtävä oon säilyttäät kanssoinvälisen rauhan ja turvalisuuđen. Ette tämän sautethaan, häyttyy YN pittäät rauhalissii metoodiita, mutta joissaki taphauksissa oon asetvoimiin pito sallittu.
Yksi esimerkki tästä oon se ette YN hyväksyi Libyan pommituksen vuona 2011 ko maan väjen haluthiin vaphauttaat Muammar al-Gaddafin diktatuurista.
YN:llä ei ole ommaa sotaväkkee
YN:llä ei ole ommii militäärissii voimii ja se oon henkkaavainen siitä ette jäsenmaat anttaavat asheita ja lähättäävät personaalii jos sitä tarvithaan. YN oon organisasuuni rauhan säilyttämistä varten, ja sotamiehet saattaavat pittäät asheita YN:n flavun alla tyhä ko het turvaavat rauhaa. YN työtelee rauhalisten ratkaisuitten etheen yhtheistyössä jäsenmaitten kans.
Tämä oon muunlaihiin ko NATO, mikä oon militäärinen alliansi. NATO suojelee jäsenmaita ulkopuolisten hyökkäyksiltä ja sillä oon sotamiehii ja asheita. YN ja NATO saattaavat työtelä yhđessä jos joku tila vaattii militäärissii toimii.
Enämen ko sota ja rauha
YN luopi yhtheistyötä joka saattaa ratkaista mailman ökonoomiset, sosiaaliset, kulttuuriset ja humanitääriset probleemit.
Se halluu poistaat köyhyyđen, pysättäät vaaraliset tauđit, estäät lukutaiđottomuutta, pysättäät miljöötuhot ja työtelä tasa-arvon etheen.
YN eđesauttaa kaikkiin ihmisten ihmisoikkeuksii ja perusvaphauksii
ilman erotusta, niin ko raasan, sukupuolen, kielen tahi uskonon tähđen. Se ette nämät moolit saattaa sauttaat, häyttyy YN pittäät yhtä. Ja tätä työtä tehđään joka päivä!
📷YN:n sotilas seissoo harjula ja kiikaroittee ympäristöö.
1 / 3
FN soldat står på en høyde og speider utover med en kikkert.
Ønsker du å lese hele artikkelen?
Ved å logge inn får du full tilgang til artikkelen, samt Lærerrommet med engasjerende læringsstier og oppgaver du kan bruke i undervisningen.
Logg inn med Feide
Ønsker du å prøve ut fullversjonen av Skolerom?
Kontakt oss her!
