I Russland kjempa arbeidarane for rettferd og betre arbeidsforhold. Vi kallar denne kampen for ein revolusjon. Folka ønskte ei rask endring av samfunnet, og mange vart drepne. Mange vestlege land var redde for at dei russiske ideane skulle spreie seg. I Tyskland og Italia førte det til fascisme og nazisme.

I mellomkrigstida vart fleire imperium oppløyste. Storbritannia var eit imperium som hadde teke kontrollen over mange andre land i verda. Fleire av desse vart no sjølvstendige land, men ikkje alle.

I USA vart det ei stor krise på børsen. Her kjøpte og selde folk aksjar. Med aksjar kunne ein eige ein del av eit firma og tene pengar på det. Men i 1929 tapte mange pengane sine på dette. Det vart kalla børskrakket på Wall Street, som er namnet på ei gate i New York der børsen ligg.

Den tyske regjeringa gjorde lite for å betre livet til innbyggjarane. Det førte til at tyskarane ville ha nye leiarar. Adolf Hitler vart svaret. Han lova å skape endringar og eit betre liv. Hitler hata overklassen og kommunistane. Aller mest hata han jødane. Hitler la ansvaret for dei dårlege tidene på dei.

Hitler var nazist. Nazistane meinte den ariske rasen var betre enn andre, og derfor hadde dei rett til å styre verda. Den ariske rasen var kvit i huda, hadde blondt hår og gjerne blå auge.

Hitler ønskte å skape eit nytt og sterkt Tyskland. Nazistane meinte at alle skulle ha respekt for partiet. Parti og land skulle vere eitt. Demokratiet tok slutt. Hitler fjerna alle motstandarar. På den måten fekk han styre åleine. Han vart ein diktator.

Alle frykta Gestapo, det hemmelege politiet. Dei som vart mistenkte for å vere imot Hitler, vart arresterte. Jødane hadde ingen rettar, og mange vart drepne.